اسلام آباد : سائفر کیس میں چیئرمین پی ٹی آئی کے جوڈیشل ریمانڈ میں تیرہ ستمبر تک توسیع کردی گئی۔
تفصیلات کے مطابق ڈپٹی سپرٹنڈنٹ جیل اٹک کے دفتر میں سائفر کیس کی سماعت ہوئی، آفیشل سیکرٹ ایکٹ عدالت کے جج ابوالحسنات ذوالقرنین نے سماعت کی۔
عدالتی عملے، ایف آئی اے حکام اورپی ٹی آئی وکلا کی موجودگی میں چیئرمین پی ٹی آئی کوخصوصی عدالت کے جج کے روبروپیش کیا گیا۔
جج ابوالحسنات ذوالقرنین نے سائفرکیس میں چیئرمین پی ٹی آئی کے جوڈیشل ریمانڈ میں تیرہ ستمبر تک توسیع کردی۔
جس کے بعد سائفر کیس میں چیئرمین پی ٹی آئی کی لیگل ٹیم نے ضمانت بعد از گرفتاری کی درخواست دائر کی، جس پر جج ابو الحسنات ذوالقرنین نے فریقین سے دو ستمبر کو دلائل طلب کر لئے۔
آفیشل سیکرٹ ایکٹ عدالت کے جج جج ابو الحسنات ذوالقرنین سماعت کے بعد اسلام آباد روانہ ہوگئے۔
یاد رہے اس سے قبل وزارت قانون نے سائفر کیس کی سماعت اٹک جیل میں کرنے کی اجازت دی تھی اور وزارتِ داخلہ کی استدعا پر وزارتِ قانون و انصاف نے جیل میں سماعت کا نوٹیفکیشن جاری کیا تھا۔
سائفر کیس کی اٹک جیل میں سماعت کا فیصلہ سکیورٹی خدشات کے پیش نظر کیا گیا تھا۔
واضح رہے سائفرکیس میں خصوصی عدالت نےچیئرمین پی ٹی آئی کا چودہ روزہ جوڈیشل ریمانڈ مںظور کیا تھا۔
