اسلام آباد : فیض آباد دھرنا کمیشن نے 3 جنوری کو سابق وزیراعظم شہباز شریف کو طلب کرلیا ہے، جہاں ان کا بیان قلمبند کیا جائے گا۔
تفصیلات کے مطابق سابق وزیراعظم شہباز شریف کو فیض آباد دھرنا کمیشن نے طلب کرلیا، ذرائع نے بتایا کہ کمیشن نے شہباز شریف کو تین جنوری کو بیان قلمبند کرانے کیلئے طلب کیا گیا ہے۔
شہباز شریف کو سابق وزیراعلیٰ پنجاب کی حیثیت سے کمیشن میں طلب کیا گیا ، اس سلسلے میں کمیشن نے فیض آباد دھرنے سے متعلق شہباز شریف کے لیے سوالنامہ بھی تیار کرلیا ہے۔
انکوائری کمیشن نے اپنی رپورٹ بائیس جنوری کو سپریم کورٹ میں جمع کرانی ہے، اس سے قبل کمیشن نے سابق وزیراحسن اقبال، سابق وزیراعظم شاہد خاقان عباسی کو بھی طلب کیا تھا جبکہ فیض حمید کو بھی بیان قلمبند کرانے کیلئے دوسرا نوٹس جاری کیا گیا ہے۔
دو ہزار سترہ میں اسلام آباد میں تحریک لبیک کے فیض آباد دھرنے کے وقت شہباز شریف وزیراعلیٰ پنجاب تھے۔
یاد رہے گزشتہ سال نومبرمیں نگراں حکومت نے فیض آباد دھرنا کیس میں عدالتی فیصلے پرعمل نہ کرنے اور ذمے داروں کے تعین کیلئے انکوائری کمیشن تشکیل دیا تھا۔
