آسٹریلین بیٹر مچل مارش نے اپنے والد کا سر فخر سے بلند کردیا، باپ اور بیٹے دونوں نے عالمی کپ جیت کر منفرد اعزاز حاصل کرلیا۔
آئی سی سی کرکٹ ورلڈکپ کے فائنل میں آسٹریلین ٹیم نے بھارت کو شکست دے کر ریکارڈ چھٹی بار شوپیس ٹرافی اٹھانے کا کارنامہ انجام دیا۔ اسی کے ساتھ مچل مارش کے خاندان نے بھی دنیائے کرکٹ میں ایک انوکھا اعزان اپنے نام کیا ہے۔
مچل مارش اور ان کے والد سابق آسٹریلین اوپنر جیف مارش دونوں اپنے اپنے دور میں ورلڈکپ جیتنے والے اسکواڈ کا حصہ بنے۔ آئی سی سی کی جانب سے بھی مچل اور جیف کی تصاویر شیئر کرتے ہوئے انھیں خراج تحسین پیش کیا گیا ہے۔
سابق آسٹریلین اوپنر جیف مارش اس آسٹریلوی ٹیم کا حصہ تھے جس نے 1987 میں ایڈن گارڈنز میں انگلینڈ کی ٹیم کو شکست دے کر ورلڈکپ جیتنے کا اعزاز حاصل کیا تھا۔
اب 2023 میں ان کے صاحبزادے اس آسٹریلین ٹیم کا حصہ ہیں جس نے بھارت کو اسی کی سرزمین پر شکست دیتے ہوئے آئی سی سی ایونٹ کی ٹرافی پر چھٹی بار قبضہ جمایا ہے۔ اس سے قبل مچل 2105 میں ورلڈکپ جیتنے والے اسکواڈ کا بھی حصہ رہ چکے ہیں.
مزے کی بات یہ ہے کہ جب جیف مارش ورلڈکپ جیتے تو وہ بھی نومبر کا مہینہ تھا۔ اس بار جب مارش عالمی کپ جیتنے والی آسٹریلین اسکواڈ کا حصہ ہیں تو یہ بھی نومبر کا ہی مہینہ ہے۔
واضح رہے کہ گزشتہ دنوں احمد آباد کے نریندر مودی اسٹیدیم میں کھیلے جانے والے فائنل میں کینگروز نے باآسانی بھارتی ٹیم کو شکست دی تھی۔ آسٹریلیا نے بھارت کی جانب سے دیے گئے 240 رنز کے ہدف کا تعاقب 4 وکٹوں کھو کر پورا کرلیا تھا۔
