امیر جماعت اسلامی کراچی حافظ نعیم کا کہنا ہے کہ غریب لوگ مجبور ہوکر وڈیروں کا ساتھ دیتے ہیں، پیپلز پارٹی آج تک گڈاپ کے لوگوں کو بھی پانی نہ دے سکی۔
واٹر بورڈ آفس کے باہر دھرنے کے شرکا سے خطاب کرتے ہوئے حافظ نعیم کا کہنا تھا کہ ہمارے نمائندے اختیار نہ ملنے کے باوجود کام کررہے ہیں۔
انہوں نے کہا کہ کراچی کے لوگ بجلی کے بھاری بلوں سے پریشان ہیں، نیپرا، کے الیکٹرک اور وائٹ کالر کرمنلز کا شیطانی اتحاد ہے، گڈاپ میں معصوم بچیوں کو میت کا غسل دینے کا بھی پانی موجود نہیں۔
حافظ نعیم نے کہا کہ مرادعلی شاہ گڈاپ میں پانی نہ دے سکے کراچی کے عوام کو کیسے دینگے، ایم کیو ایم نے مشرف سے ملکر کے ای ایس سی کو کھمبوں کی قیمت میں بیچا۔
کراچی کے عوام کچے اور پکے کے ڈاکوؤں سے جان چھڑانا چاہتے ہیں، حافظ نعیم نے مطالبہ کہ کے الیکٹرک لائسنس فوری منسوخ اور فارنزک آڈٹ کیا جائے، انہوں نے کہا کہ وڈیرہ شاہی نظام انسانوں کو غلام بنانے کا نام ہے۔
انگریزوں کے غلاموں کی اولادیں پاکستان کی قسمت کا فیصلہ کررہی ہیں، کراچی کے لوگ بہت پریشان حال ہیں،کراچی کے سودا گر 35 سال سے کھیل، کھیل رہے تھے۔
مراد علی شاہ صاحب کہتے تھے ہماری تحریک ختم ہوجائیگی۔ مراد علی شاہ صاحب ہماری تحریک پھر سے شروع ہوگئی ہے، اس سارے کرپٹ ٹولے کو رخصت کرکے دم لیں گے۔
