کراچی : پاکستان شوبز کی معروف اداکارہ حنا خواجہ بیات اپنے مرحوم شوہر کا تذکرہ کرتے ہوئے جذباتی ہوگئیں ان کا کہنا تھا کہ میں نے محبت کرنا راجر سے سیکھا۔
اے آر وائی ڈیجیٹل کے پروگرام گڈ مارننگ پاکستان میں ٹیلی وژن ڈراموں کی معروف اداکارہ حنا خواجہ بیات نے شرکت کی اور اپنی نجی زندگی کے بارے میں کچھ باتیں ناظرین سے شیئر کیں۔
میزبان ندا یاسر سے گفتگو کرتے ہوئے انہوں نے اپنے مرحوم شوہر روجر بیات داؤد کے ساتھ گزارے ہوئے دنوں کی یادیں بیان کیں۔
انہوں نے بتایا کہ میں نے راجر سے محبت کرنا سیکھا، کیونکہ میرے شوہر بہت اچھے اخلاق کے مالک تھے اپنوں کے ساتھ ساتھ غیر لوگ بھی ان کی بہت عزت اور تعریف کیا کرتے تھے۔
انہوں نے بتایا کہ ہمارے درمیان بے حد محبت تھی، اور ہم آپس میں لڑتے بھی بہت تھے، میاں بیوی ہونے کے ساتھ ساتھ ہم بہت اچھے دوست بھی تھے، میں آج بھی ان کی کمی شدت سے محسوس کرتی ہوں۔
انہوں نے مزید کہا کہ میرے میاں کا دل بہت بڑا اور نیک تھا وہ ہمیشہ مسکراتے رہتے، ان کا اللہ پر ایمان بہت مضبوط تھا۔ میری ان سے چھوٹی موٹی باتوں پر اکثر وقت لڑائی ہوتی رہتی مگر دونوں ایک دوسرے کی دل سے بہت عزت کرتے تھے۔
یاد رہے کہ اداکارہ حنا خواجہ بیات کے شوہر روجر بیات داؤد کا رواں سال جنوری میں کینسر کے مرض میں مبتلا ہونے کے بعد انتقال ہوگیا تھا۔
اداکارہ اکثر اپنے شوہر کے ساتھ گزارے ہوئے30سال کے خوشگوار لمحات کی یادگار تصاویر سوشل میڈیا پر مداحوں کیلئے شیئر کرتی رہتی ہیں۔
