بھارتی وزیر ریلوے اشونی وشنو کا کہنا ہے کہ اوڈیشہ ٹرین حادثے کی اصل وجہ سامنے آگئی ہے اور اس کے ذمہ دار افراد کی بھی شناخت ہوگئی ہے۔
بھارتی میڈیا رپورٹس کے مطابق وزیر ریلوے کا کہنا ہے کہ جائے وقوعہ سے امدادی کام مکمل کرلیا گیا ہے آئندہ چند روز میں ٹرین سروس بحال کردی جائیں گی۔
ٹرین حادثے کے بعد کووچ سسٹم پر بحث کے دوران کانگریس نے وزیر ریلوے کے استعفیٰ کا مطالبہ کیا تھا اور پوچھا تھا کہ مودی حکومت یہ سسٹم کب لگائے گی۔
وزیر ریلوے نے کہا کہ ٹرین حادثے کا اس سسٹم سے کوئی لینا دینا نہیں ہے، تبدیلی الیکٹرانک انٹرلاکنگ میں ہوئی تھی جس کے نتیجے میں حادثہ پیش آیا۔
انہوں نے کہا کہ الیکٹرانک پوائنٹ مشین، ریلوے سگنلنگ اور الیکٹرانک انٹر لاکنگ میں اہم آلہ ہوتی ہے اس پوائنٹ کی سیٹنگ تبدیل کردی گئی تھی جس کی وجہ سے حادثہ رونما ہوا۔
اشونی وشنو نے کہا کہ یہ سیٹنگ کیوں اور کیسے تبدیل کی گئی اس کا پتا تحقیقاتی رپورٹ آنے کے بعد چلے گا۔
واضح رہے کہ ٹرین حادثے میں ہلاک ہونے والے افراد کی تعداد 300 سے تجاوز کرگئی ہے، ٹرین میں تقریباً 2 ہزار مسافر سوار تھے۔
