9مئی کو ایک جماعت کے سیاسی بلوائیوں نے چند شرپسند لیڈرز کی ہدایات پر جناح ہاؤس کو خاکستر کردیا،رہائش گاہ میں موجود سامان کو لوٹ مار کا نشانہ بھی بنایا گیا۔
رپورٹ کے مطابق جناح ہاؤس بابائے قوم قائد اعظم محمد علی جناح کی لاہور میں ذاتی جائیداد کے نام سے مشہور ہے، قائداعظم محمد علی جناح نے یہ پراپرٹی 1943 میں موہن لعل بھاسن سے خریدی تھی۔
جناح ہاؤس لاہور اس وقت پہلے ہی برطانوی فوج کے زیر استعمال تھا، یہ رہائش گاہ پاک وہند تقسیم سے پہلے فوجی حکام کے استعمال کے لیے طلب کی گئی تھی۔
31جنوری 1948 کو ڈی ریکوزیشن کرکے قائد اعظم کے نمائندے سید مراتب علی کی دی گئی، جناح ہاؤس میں قائداعظم محمد علی جناح کے استعمال کی نادر و نایاب اشیاء سنبھال کر رکھی گئی تھیں۔
بابائے قوم کی تاریخی تصاویر، زیراستعمال صوفہ، اسنوکر ٹیبل، کرسیاں جناح ہاؤس کی زینت تھیں، سگاردان، گلدان، بستر، جوتے اور کپڑوں سمیت 1500 سے زائد تاریخی نوادرات موجود تھیں، یہ سب کچھ 9 مئی سے قبل بالکل محفوظ تھا۔
شر پسندوں کے دنگافساد کےدوران قائد اعظم کی تمام تر نوادرات جلا کر خاکستر کردی گئیں، شرپسندوں نے پورے گھر کو آگ کے شعلوں کے سپرد کردیا۔
جناح ہاؤس کی باقی ماندہ اشیاء میں فقط جلی چند دیواریں اور قائداعظم کا ادھ جلا پاسپورٹ ہے، یہ سب من حیث القوم پوری قوم سے اپنی بے بسی کا سوال کرتا رہے گا۔
مشتعل شرپسندوں نے منصوبہ بندی کے ساتھ اس تاریخی رہائش گاہ پر حملہ کیا، رہائش گاہ میں موجود سارے سامان کو لوٹ مار کا نشانہ بنایا،9مئی کو سیاسی بلوائیوں اور شرپسندوں نے جناح ہاؤس جلا کر تاریخ میں ایک سیاہ باب رقم کیا۔
