کراچی : گلستان جوہر بھٹائی آباد میں یو سی چیئرمین کے قتل کا مقدمہ درج کرلیا گیا، مدعی مقدمے نے بتایا کہ سنجرانی نے مقتول صابر مگسی کو گولی ماری۔
تفصیلات کے مطابق کراچی کے علاقے گلستان جوہر بھٹائی آباد میں یوسی چیئرمین کے قتل کا مقدمہ مقتول کے کزن کی مدعیت میں ملیر کینٹ تھانے میں درج کرلیا گیا۔
مدعی مقدمہ نے اپنے بیان میں کہا کہ میرے چچا کا علاقے میں کیبل نیٹ ورک کا کام ہے، چچا کا بیٹا اپنے 3 ساتھیوں کے ساتھ کیبل کی خرابی درست کرنے گیا تھا۔
مقتول کے کزن کا کہنا تھا کہ مخالف سنجرانی گروپ کے 14 سے 15 افراد جمع ہوگئے اور کام سے روکا میں نے واقعہ کی اطلاع اپنے کزن یوسی چیئرمین صابر مگسی کو دی تو مقتول صابر مگسی نے کہا کہ محلے کی بات ہے آپ لوگ لڑائی جھگڑا مت کرنا۔
مدعی مقدمہ نے مزید کہا کہ میں اپنے دیگر 2 لوگوں کے ساتھ وہاں پہنچا تو سنجرانی گروپ نے ہم پر حملہ کردیا، سنجرانی گروپ نے 222رائفل،پستول اور لوہے کے سرئے سے ہم پرحملہ کیا۔
مقتول صابر مگسی وہاں پہنچا تو اس نے سنجرانی گروپ سے کہا کہ ہمیں زخمیوں کو اسپتال لے جانے دومشتاق سنجرانی نے مقتول صابر مگسی کو بھی گولی ماردی، میں صابر مگسی کو اسپتال لے گیا جہاں وہ دم توڑ گیا۔
یاد رہے گذشتہ روز کراچی : بچوں کی لڑائی پر ہونے والے جھگڑے میں فائرنگ سے یوسی چیئرمین جاں بحق ہوگیا تھا، مقتول صابر مگسی گلستان جوہر یو سی 9 کا منتخب چئیرمین تھا۔
مقتول صابر مگسی 2 بچوں کا باپ تھا اور پراپرٹی کا کاروبار کرتا تھا جبکہ اس کا تعلق پیپلز پارٹی سے تھا۔
