کراچی میں دودھ کی قیمت میں من مانے اضافے کے خلاف انتظامیہ نے کریک ڈاؤن کا فیصلہ کرلیا۔
اے آر وائی نیوز کے مطابق کراچی میں ڈیری فارمرز نے دودھ کی فی لیٹر قیمت میں 20 روپے اضافہ کردیا جس کے بعد دودھ کی نئی قیمت 230 روپے فی لیٹر ہوگئی جبکہ دہی کی قیمت بھی 20 روپے اضافے کے بعد 340 روپے ہوگئی۔
تاہم انتظامیہ نے دودھ کی قیمت میں من مانے اضافے کیخلاف انتظامیہ کیخلاف کریک ڈاؤن کا فیصلہ کیا ہے۔
انتظامیہ نے 180 روپے فی لیٹر دودھ اپنی نگرانی میں فروخت کروایا، کمشنر کراچی کا کہنا ہے کہ ڈپٹی کمشنرز سرکاری نرخ کی خلاف ورزی کرنے والے دودھ فروشوں کیخلاف کارروائی کریں۔
کمشنر کا کہنا ہے کہ جو سرکاری نرخ کی خلاف ورزی کرے ان سے اپنی نگرانی میں دودھ سرکاری نرخ پر فروخت کروائیں۔
دودھ فروشوں کے مطابق دودھ باڑے سے مہنگا کیا گیا ہے اور ایک لیٹر دودھ 230 روپے میں بیچا جارہا ہے۔
دودھ فروشوں نے حکومت سندھ کے احکامات ماننے سے انکار کردیا۔
خریداروں کا کہنا ہے کہ دودھ کی قیمت بڑھانا غیرقانونی ہے لہٰذا انتظامیہ فوری ایکشن لے، کمشنر کراچی دودھ کی قیمتوں کو کنٹرول کرنے میں ناکام ہیں۔