اسلام آباد: نیشنل الیکٹرک پاور ریگولیٹری اتھارٹی (نیپرا) نے گوادرپاور پلانٹ کے ٹیرف میں 182 فیصد اضافہ کردیا۔
تفصیلات کے مطابق نیشنل الیکٹرک پاور ریگولیٹری اتھارٹی (نیپرا) نے گوادر کول پاورپلانٹ کے ٹیرف میں 182 فیصد اضافے کی منظوری دے دی۔
300 میگاواٹ کے گوادر کول پاور پلانٹ کا ٹیرف 22.34 روپے فی یونٹ کردیا گیا اور گوادر پاور پلانٹ کی لاگت بھی 145 فیصد اضافے سے 103 ارب روپے پر پہنچ گئی۔
نیپرا نے چینی پاور کمپنی کی درخواست پر فیصلہ وفاقی حکومت کو بھجوادیا اور ٹیرف میں اضافے کی بڑی وجہ ڈالر کے مقابلے روپے کی بے قدری قرار دے دی۔
نیپرا نے گوادر پاور پلانٹ کا ٹیرف 7.9روپے سے بڑھاکر 22.34 روپے فی یونٹ کردیا ، اس سے قبل ٹیرف کے تعین کیلئے ڈالر کا ریٹ105 روپے لیا گیا تھا۔
اب نیپرا نے287 روپے کے ڈالر کے حساب سےٹیرف منظور کیا ، گوادرپاور پلانٹ کی لاگت 42ارب روپے سےبڑھ کر 103ارب روپے ہوگئی ہے۔
