اسلام آباد : عدالت نے ممنوعہ فنڈنگ کیس اور دہشت گردی کیس میں چیئرمین پی ٹی آئی کی عبوری ضمانت میں توسیع کردی۔

تفصیلات کے مطابق اسلام آباد بینکنگ کورٹ میں ممنوعہ فنڈنگ کیس اور فارن ایکسچینج ایکٹ کے تحت مقدمے کی سماعت ہوئی۔

پراسیکیوٹر راجہ رضوان عباسی عدالت میں پیش میں پیش ہوئے ، اسپیشل پراسیکیوٹر راجہ رضوان عباسی نے بتایا کہ کرنل ریٹائرڈ یونس، طارق شفیع، حامد زمان کی جانب سے انوسٹیگیشن جوائن کی گئی ہے ، دیگر ملزمان کی جانب سے انوسٹیگیشن جوائن نہیں کی گئی نا تعاون کیا جا رہا ہے۔

پراسیکیوٹر نے سابق وزیر اعظم عمران خان کی استثنیٰ کی درخواست کی مخالفت کرتے ہوئے کہا قانون کی نگاہ میں تمام ملزم برابر ہیں۔

وکیل صفائی نعیم پنجوتھا نے کہا کہ انوسٹیگیشن جوائن کرنے کی یقین دہائی ، جس پر عدالت نے استفسار کیا انوسٹیگیشن کب جوائن کریں گے۔

وکیل صفائی نعیم پنجوتھا نے بتایا کہ ایک ہفتے کے بیڈ ریسٹ پر ہیں، میڈیکل کروا کے انوسٹیگیشن جوائن کریں گے، 24 ایف آئی آر درج ہوئی ان تمام میں شریک ہوئے۔

عدالت نے دلائل مکمل ہونے پر عمران خان ، طارق شفیع ، فیصل مقبول و دیگر کی عبوری ضمانت میں 23 نومبر تک توسیع کردی۔

دوسری جانب عدالت نے احتجاجی مظاہرے اور کار سرکار میں مداخلت کے کیس میں میڈیکل گراؤنڈ پر عمران خان کی حاضری سے استثنیٰ کی درخواست منظور کرلی۔

عدالت نے عمران خان کی عبوری ضمانت میں 21 نومبر تک توسیع بھی کردی۔

لاہور : لاہور ہائی کورٹ نے بھینس چوری کے ملزم کی ضمانت خارج کردی، جس کے بعد ملزم احاطہ عدالت سے فرار ہوگیا۔

تفصیلات کے مطابق لاہور ہائی کورٹ میں بھینس چوری کے ملزم کی ضمانت خارج کردی گئی ، ضمانت خارج ہونے پر ملزم احاطہ عدالت سے فرار ہوگیا۔

مقدمے کے مدعی نے ملزم کو پکڑ کر پولیس کےحوالےکردیا اور ساہیوال پولیس ملزم کوگرفتار کر کے ساتھ لے گئی۔

ملزم کے خلاف ساہیوال پولیس نے بھینس چوری کا مقدمہ درج کر رکھا ہے۔

اسلام آباد : وفاقی شرعی عدالت نے ٹرانس جینڈرز مرد اور عورت کے تعین سے متعلق نادرا سے شناختی کارڈ کے اجرا کے طریقہ کار پر رپورٹ طلب کرلی۔

تفصیلات کے مطابق اسلام آباد کی وفاقی شرعی عدالت میں ٹرانسجینڈرایکٹ کیخلاف درخواستوں پر سماعت ہوئی۔

وکیل نادرا نے بتایا کہ نادراریگولیشن 13ٹرانسجینڈر ایکٹ کے آنے سےغیر موثر ہو گیا ہے ، ایکٹ سے پہلے نادرا ٹرانسجینڈرز مرد اور ٹرانسجینڈر خاتون کے شناختی کارڈجاری کرتا تھا ، ٹرانسجینڈر ایکٹ کے اجراکے بعد شناختی کارڈ پر ٹرانسجینڈر کے لیے ایکس لکھا جاتا ہے۔

وفاقی شرعی عدالت نے سوال کیا کہ نادرا نےٹرانسجینڈر خاتون اورٹرانسجینڈر مرد کی تعریف کیسے بنائی ہے؟ وکیل نادرا نے کہا کہ اس بات پر تیاری کا وقت دے دیں۔

جس پر چیف جسٹس نے کہا کہاتنے دنوں بعد کیس کی سماعت پر بھی آپ نے بنیادی نکتےپر تیاری نہیں کی، وضاحت دیں نادرا کس طریقہ کار کے تحت ٹرانسجینڈر کا تعین کر رہا ہے۔

جماعت اسلامی کے سینیٹرمشتاق احمدشرعی عدالت میں پیش ہوئے اور کہا ایکٹ کا معاملہ طے ہونے تک اس متعلق معاملات روک دیے جائیں، کوئی مرد جب ٹرانسجینڈر کا شناختی کارڈ بنوانے آئے تو میڈیکل ٹیسٹ ہوتا ہے یا نہیں؟

چیف جسٹس شرعی عدالت نے سوال کیا ٹرانسجینڈر قانون سے کتنے افراد کو فائدہ پہنچایا ہے؟ جسٹس سید محمد انور نے کہا کہ اب تک ٹرانسجینڈر ایکٹ سے فائدہ پہنچنے والوں کی تعدادصفر بتائی گئی ہے۔

نمائندہ وزارت انسانی حقوق نے بتایا کہ وزارت ہیومن رائٹس میں ٹرانسجینڈر تحفظ سینٹرقائم کیا گیا ہے، ، وفاقی شرعی عدالت نے ہدایت کی وزارت انسانی حقوق ٹرانسجینڈرز کے معاملےکو سنجیدگی سے دیکھے۔

وفاقی شرعی عدالت نے سوال کیا نادرا ٹرانسجینڈرز مرد اورٹرانسجینڈر عورت کا تعین کیسے کرتا ہے؟ شناختی کارڈ کے اجرا کے طریقہ کار پر رپورٹ 15دن میں جمع کرائیں۔

عدالت نے نادرا سے ٹرانسجینڈرکی تعریف پر شناختی کارڈ کے اجراکے طریقہ کار پر رپورٹ طلب کرلی۔

لاہور : چئیرمین تحریک انصاف عمران خان کے دونوں بیٹے والد سے ملنے اور عیادت کے لیے پاکستان پہنچ گئے ہیں۔

تفصیلات کے مطابق تحریک اںصاف کے چیئرمین عمران خان کے دونوں بیٹے قاسم اور سلمان پاکستان پہنچ گئے۔

قاسم اور سیلمان کو سخت سکیورٹی میں زمان پارک پہنچایا گیا، جہاں دونوں بیٹوں نے اپنے والد عمران خان سے ملاقات کی اور ان کی عیادت کی۔

یاد رہے گذشتہ ہفتے پی ٹی آئی کے لانگ مارچ کے دوران کنٹینر پر فائرنگ کے نتیجے میں عمران خان زخمی ہوگئے تھے۔

شوکت خانم میموریل اسپتال کے ڈاکٹروں نے ان کا آپریشن کیا تھا، جس کے بعد لاہور زمان پارک میں واقع اپنی رہائش گاہ پر صحت یاب ہو رہے تھے۔

خیال رہے اس سے قبل عمران خان کی سابق اہلیہ جمائما گولڈ اسمتھ نے قاتلانہ حملے پر صدمے کا اظہار کیا تھا اور اس شخص کی بھی تعریف کی، جس نے پارٹی کے لانگ مارچ کے دوران پی ٹی آئی سربراہ پر حملے کو ناکام بنایا۔