کراچی : نجکاری اور ایوی ایشن کے وفاقی وزیر محمد میاں سومرو نے کہا ہے کہ پی آئی اے درست سمت میں جارہی ہے اور حکومت اس کی بحالی کے لئے ہر ممکن امداد فراہم کرے گی۔

یہ بات انہوں نے ائر لائن ہیڈ آفس کے دورے کے موقع پر کہی۔ انہوں نے پی آئی اے کے صدر و چیف ایگزیکٹو آفیسر ائر مارشل ارشد ملک سے ملاقات میں کی جس میں انہیں ایر لائن کی کار کردگی کے بارے میں آگاہ کیا۔

پی آئی اے کے سینئر افسران سے خطاب کرتے ہوئے ایوی ایشن کے وزیر نے کہا کہ پی آئی اے میں ترقی کے بہت زیادہ مواقع اور صلاحیت موجود ہیں اوراس کی کھوئی ہوئی ساکھ کو بحال کیا جا سکتا ہے، حکومت پی آئی اے کو ایک منافع بخش ادارہ بنانے کے لئے کوشاں ہے اور اس کے لئے ہر طرح کی مدد فراہم کی جائے گی۔

میاں محمد سومرو نے کہا کہ مارکیٹ میں مقابلے کے لئے ہمیں اپنی خدمات کے معیار میں مزید بہتری لانا ہوگی اور جدید ٹیکنالوجی کا استعمال کرنا ہوگا، مسافر کو سہولیات کی فراہمی ہماری اولین ترجیح ہیں،انہوں نے اس بات پر زور دیا کہ پی آئی اے میں فالتو اخراجات ختم کر کے بچت کی جائے۔

اس موقع پر وزیر ہوا بازی نے ایئر مارشل ارشد ملک کی قیادت میں اٹھائے جانے والے اقدامات کی تعریف کی جن کے مثبت نتائج برآمد ہو رہے ہیں۔ قبل ازیں ایئر مارشل ارشد ملک نے وفاقی وزیر کو بتایا کہ پی آئی اے کے بند کئے گئے روٹس کو بحال کیاجارہا ہے جبکہ نیٹ ورک میں وسعت کے لئے نئے منافع بخش روٹس کی منصوبہ بندی کی جارہی ہے۔

کھانوں کے معیار اور شیڈولنگ میں بہتری لائی گئی ہے اور اس کے ساتھ ساتھ ائر لائن میں پہلی دفعہ اخراجات میں کمی کے لئے ہنگامی بنیادوں پر اقدامات کا آغاز کردیا گیا ہے ان نئے اقدامات کی بدولت ائر لائن کے معیار میں بہتری دیکھنے میں آرہی ہے۔

انہوں نے کہا کہ مسافروں کے علاوہ ائر لائن کے ریونیو میں اضافے کے لئے خاص طور پر کارگو سیکٹر پر توجہ دی جارہی ہے، جس سے ریونیو میں اضافے میں خاطر خواہ مدد ملے گی۔

دورے کے اختتام پر انہوں نے ائر لائن کا دورہ کرنے اور اس کی بحالی میں تعاون پر وزیر ایوی ایشن کا شکریہ ادا کیا، اس موقع پر محمد میاں سومرو کو ایئر مارشل ارشد ملک کی جانب سے پی آئی اے کی یاد گاری شیلڈ بھی پیش کی گئی۔