واشنگٓٹن: امریکی صدر کے سابق وکیل مائیکل کوہن کو عدالت نے 3 سال قید کی سزا سنادی۔

غیرملکی خبررساں ادارے کے مطابق امریکی صدر کے سابق وکیل مائیکل کوہن کو امریکی عدالت نے تین سال قید کی سزا سنادی ہے، مائیکل کوہن پر ٹیکس فراڈ، مالیاتی اداروں، کانگریس سے غلط بیانی کے الزامات ہیں۔

مائیکل کوہن نے اپنی سزا کے بعد میڈیا سے گفتگو کرتے ہوئے کہا کہ یہ میری ڈیوٹی تھی کہ امریکی صدر ڈونلڈ ٹرمپ کے غلط کاموں کو چھپاؤں۔

امریکا کے ڈسٹرکٹ جج ولیم ایچ نے کہا کہ مائیکل کوہن وکیل ہیں اور فیصلے کو مجھ سے زیادہ اچھی طرح سمجھ سکتے ہیں۔

واضح رہے کہ مائیکل کوہن کا کہنا تھا کہ انہوں نے کمپین فنانس قوانین یعنی انتخابی مہم کے مالیاتی امور کے حوالے سے قوانین کی خلاف ورزی کی ہے۔

51 سالہ مائیکل کوہن نے استغاثہ کے ساتھ ایک معاہدے میں ٹیکس اور بینک فراڈ سمیت آٹھ جرائم کا اعتراف کیا تھا۔

مزید پڑھیں: اسٹورمی ڈینئیلزکو ٹرمپ سے تعلقات خفیہ رکھنے پرخطیررقم ادا کی، مائیکل کوہن کا انکشاف

مائیکل کوہن کے جرائم کی سزا 65 سال قید ہے تاہم ان کی جانب سے خود اعتراف کے عوض استغاثہ نے ان کے ساتھ جو معاہدہ کیا ہے اس میں انہیں پانچ سال قید تین ماہ کی سزا سنائی جانی تھی۔

خیال رہے کہ امریکی اداکارہ اسٹورمی ڈینئلز کا کہنا تھا کہ انہیں ایک لاکھ تیس ہزار ڈالر مائیکل کوہن نے 2016 کے صدارتی انتخاب سے صرف چند روز پہلے ادا کیے تھے تاکہ وہ صدر ٹرمپ اور ان کے درمیان افیئر کی تفصیلات ظاہر نہ کریں۔

یاد رہے کہ امریکی صدر ٹرمپ نے کانگریس کے سامنے جھوٹ بولنے پر اپنے سابق وکیل کو طویل عرصے تک قید میں رکھنے کا مطالبہ کیا تھا۔

کینبرا: آسٹریلین شہری نے بدھا کا گندھارا مجسمہ پاکستان کو واپس کرکے اچھی روایت قائم کردی۔

غیرملکی خبررساں ادارے کے مطابق بدھا کا گندھارا مجسمہ واپس کرنے کے لیے کینبرا کے پاکستانی ہائی کمیشن میں تقریب کا انعقاد کیا گیا۔

تقریب میں سول سوسائٹی، وزراء کے اہلخانہ، یوتھ، کمیونٹی سروسز سمیت میڈیا نمائندوں کو مدعو کیا گیا تھا۔

رپورٹ کے مطابق آسٹریلوی خاتون رومی ڈنگل کی والدہ 1970 کے اوائل میں گندھارا مجسمہ آسٹریلیا لائی تھیں، ان کے اہل خانہ نے فیصلہ کیا کہ مجسمہ پاکستان کو تحفے کے طور پر پیش کیا جائے تاکہ اسے اس کی اصل جگہ پر پہنچایا جاسکے۔

پاکستانی ہائی کمشنر بابر امین نے تقریب سے خطاب کرتے ہوئے کہا کہ گندھارا مجسمہ ثقافتی تاریخ اور پاکستان کی ورثہ کا اہم عنصر ہے، یہ تحفہ پاکستان کے لیے مجسمے سے بہت بڑھ کر ہے۔

مزید پڑھیں: شاہراہ ریشم پرسفرکرتی گندھارا تہذیب

بابر امین نے اہل خانہ کا شکریہ ادا کرتے ہوئے کہا کہ یہ تحفہ پاکستان کے لیے بہت اہمیت کا حامل ہے، اس مجسمہ آرٹ کے شوقین افراد کی معلومات میں بھی اضافہ ہوگا۔

ان کا کہنا تھا کہ میں جانتا ہوں کہ عوام کو اس کی قدرو قیمت کا اندازہ ہوگا، یہ پاکستان کی تاریخ کا ایک حصہ ہے جس کا تعلق پوری دنیا میں رہنے والے افراد سے ہے۔

رپورٹ کے مطابق تحقیق کی گئی جس کے بعد پتا چلا کہ یہ مجسمہ پشاور کے علاقے میں موجود سوات وادی سے لایا گیا ہے۔

واضح رہے کہ مجسمہ سازی گندھارا آرٹ سے متاثر ہو کر شروع کی گئی۔ گندھارا آرٹ وہ آرٹ ہے جو بدھ مذہب کے ماننے والوں نے شروع کیا اور اسے ’بدھسٹ آرٹ‘ کہا جاتا ہے۔