کراچی: نگراں وزیر تعلیم سندھ رعنا حسین جاتے جاتے 100 سے زائد سرکاری اسکولوں کو این جی اوز کے حوالے کرنے کا فیصلہ کر گئیں۔

محکمہ تعلیم سے منسلک ذرائع نے اے آر وائی نیوز کو بتایا کہ 100 سے زائد سرکاری اسکولز کو این جی اوز کو دینے کا فیصلہ نگراں وزیر تعلیم رعنا حسین نے کیا تھا۔

ذرائع نے بتایا کہ بجٹ محکمہ تعلیم کا ہوگا لیکن اسکول چلانے کی ذمہ داری این جی اوز کو دے دی گئی، شہر کی بڑی این جی اوز کو خستہ حال اسکول سونپے گئے ہیں۔

انہوں نے مزید بتایا کہ 60 سرکاری اسکول کراچی جبکہ دیگر اسکول سندھ کے مختلف شہروں میں ہیں، سرکاری اسکولوں کی خراب حالت دیکھ کر یہ فیصلہ لیا گیا۔

یاد رہے کہ این جے وی، خاتون پاکستان، ملالہ گورنمنٹ اسکول سمیت متعدد تعلیمی ادارے این جی اوز چلا رہی ہیں۔

سندھ میں پبلک اسکولوں کی تعمیر

گزشتہ ماہ فروری میں نگراں سندھ حکومت نے صوبے کے 6 اضلاع میں دو ارب روپے کی لاگت سے نئے اسکولوں کی تعمیر کے کام کا آغاز کیا۔ جن اضلاع میں پبلک اسکولوں کی تعمیر شروع کی گئی ان میں ٹنڈوالٰہیار، مٹیاری، ٹنڈو آدم، سانگھڑ، ٹنڈو محمد خان اور گھوٹکی شامل ہیں۔

اسکولز کی تعمیراتی لاگت میں مہنگائی کے باعث دوبارہ نظر ثانی کی گئی اور اس کو بڑھا کر 2 ارب، 14 کروڑ، 88 لاکھ، 82 ہزار کر دیا گیا۔

محکمہ منصوبہ بندی وترقیات نے پبلک اسکولوں کیلیے بجٹ جاری کرنے کی منظوری دی اور محکمہ خزانہ کو پانچوں منصوبوں کیلیے فنڈز جاری کرنے لیے خط لکھا۔

خط میں کہا گیا تھا کہ رقم فوری جاری کی جائے تاکہ منصوبوں کو بروقت مکمل کیا جا سکے۔

دوسری جانب محکمہ منصوبہ بندی کے مراسلے کے بعد مذکورہ پبلک اسکولوں کی تعمیر کیلیے مختص رقم جاری کرنے کی منظوری دی گئی۔

لاہور: پاکستان تحریک انصاف کے سینیٹر اعجاز چوہدری کو جیل میں دل کی تکلیف کے باعث پنجاب انسٹیٹیوٹ آف کارڈیالوجی منتقل کر کے ان کا معائنہ کروایا گیا۔

ذرائع نے اے آر وائی نیوز کو بتایا کہ سینیٹر اعجاز چوہدری کو سخت سکیورٹی میں پی آئی سی لایا گیا جہاں انہیں معائنے کے بعد اسلام آباد لے جایا جائے گا۔

اس موقع پر میڈیا سے گفتگو میں سینیٹر اعجاز چوہدری نے کہا کہ مجھے جیل میں 10 ماہ ہوگئے، سینیٹر ہونے پر میرے ہر سینیٹ اجلاس کیلیے پروڈکشن آرڈر جاری ہونے چاہییں، ڈپٹی چیئرمین سینیٹ شکر گزار ہوں کہ کم از کم کل صدارتی ووٹ ڈال سکوں گا۔

انہوں نے کہا کہ مجھے کوٹ لکھپت جیل سے اب سینیٹ کیلیے لے کر جا رہے ہیں، جو مینڈیٹ 8 فروری کو ملا وہ پارلیمان میں نظر بھی آنا چاہیے، 10 ماہ سے عدالت کے سامنے پیش ہو رہے ہیں لیکن اب انصاف ہونا چاہیے۔

دوسری جانب صدر مملکت کے انتخاب کیلیے کل بروز ہفتہ کو ہونے والے پارلیمنٹ کے مشرکہ اجلاس میں شرکت کیلیے چیئرمین سینیٹ اور اسپیکر قومی اسمبلی نے اعجاز چوہدری کے پروڈکشن آرڈر جاری کر دیے۔

پروڈکشن آرڈر جیل حکام کو موصول ہوگئے جس میں کہا گیا کہ مشترکہ اجلاس میں نئے صدر کا انتخاب ہوگا جس میں اعجاز چوہدری کی بطور سینیٹر اجلاس میں شرکت ضروری ہے۔

آرڈر میں کہا گیا کہ صدر مملکت کے انتخاب کیلیے ان کو پارلیمنٹ ہاؤس لایا جائے، صدراتی الیکشن کے بعد ان کو پولیس کی حراست میں دے دیا جائے گا۔

اسلام آباد: سابق نگراں وزیر اعلیٰ پنجاب اور موجودہ چیئرمین پاکستان کرکٹ بورڈ محسن نقوی حکومتی اتحاد کی جانب سے ایوانِ بالا (سینیٹ) کا الیکشن لڑیں گے۔

ذرائع نے اے آر وائی نیوز کو بتایا کہ محسن نقوی کو سینیٹر منتخب ہونے کے بعد وفاق میں اہم وزارت دی جائے گی تاہم وہ چیئرمین پی سی بی کا عہدہ بھی برقراررکھیں گے۔

ذرائع کے مطابق ان کو سینیٹر منتخب ہونے کے بعد وفاقی وزیر داخلہ بنانے پر غور کیا جا رہا ہے۔

محسن نقوی نگراں وزیر اعلیٰ پنجاب رہے جبکہ حال ہی میں وہ پی سی بی کے بلا مقابلہ چیئرمین منتخب ہوئے ہیں۔

متعلقہ: وزیر اعلیٰ ہاؤس کا سارا خرچہ میں خود اٹھا رہا ہوں، محسن نقوی

پی سی بی چیئرمین کے انتخاب کیلیے گورننگ بورڈ کا اجلاس نیشنل کرکٹ اکیڈمی میں ہوا تھا جس میں چیئرمین کیلیے محسن نقوی اور مصطفیٰ رمدے امیدوار تھے تاہم آخری وقت میں وہ مقابلے سے دستبردار ہوگئے تھے۔

محسن نقوی کو تین سال کیلیے کرکٹ بورڈ کی سربراہی سونپی گئی ہے۔ وہ پی سی بی کے 37ویں چیئرمین اور یہ عہدہ پانے والے 33ویں شخص ہیں۔

اس سے قبل نجم سیٹھی تین بار، ذکا اشرف اور شہریار خان دو دو مرتبہ چیئرمین کے عہدے پر ذمے داریاں انجام دے چکے ہیں۔

دسمبر 2022 میں سابق چیئرمین پی سی بی رمیز راجا کو برطرف کیا گیا تھا جس کے بعد نئے چیئرمین کو آنے میں 14 ماہ کا وقت لگا تھا۔

کراچی: نو منتخب وزیر اعلیٰ سندھ مراد علی شاہ نے محکمہ پولیس سمیت دیگر انتظامیہ میں تبدیلی لانے کا اعلان کرتے ہوئے کہا ہے کہ امن و امان کی صورتحال تسلی بخش نہیں ہے۔

وزیر اعلیٰ سندھ نے میڈیا سے گفتگو میں کہا کہ شہروں اور کچے کے علاقے امن و امان سے مطمئن نہیں ہوں لہٰذا پولیس اور انتظامیہ تبدیلیاں لائی جائیں گی، کچھ دنوں میں پولیس میں تبدیلیاں لائی جائیں گی۔

مراد علی شاہ نے کہا کہ کابینہ کی تشکیل دی جا رہی ہے، کچھ دنوں میں کابینہ کا بھی حلف اٹھائے گی۔

انہوں نے کہا کہ ہم نے بھی رمضان ریلیف  پروگرام بنایا  ہے، اس سال ہم آٹا ڈسٹری بیوشن اور بچت باراز نہیں لگائیں گے بلکہ براہ راست ڈیٹا کیش اسکیم چلائیں گے، پچھلے سال 2 ہزار روپے پر فی خاندان دیے تھے تاہم اس سال مہنگائی کے پیش نظر 5 ہزار پر فی خاندان دیں گے۔

متعلقہ: وزیر اعلیٰ سندھ کی ہدایت پر پرائس لسٹ جاری، کیا عمل درآمد ہو سکے گا؟

ان کا کہنا تھا کہ براہ راست کیش اسکیم سے 44 لاکھ 13 ہزار 584 خاندان مستفید ہوں گے، رمضان کی آمد ہے حکومتیں کوشش کرتی ہیں کہ عوام کو ریلیف دیا جائے، مہنگائی کو کنٹرول کرنا حکومت کا کام ہے، کل سے رمضان پرائس کنٹرول اتھارٹی پر کام شروع کر دیا ہے۔

مراد علی شاہ نے کہا کہ سخت ہدایت کی ہے کہ عوام کو رمضان میں مہنگائی کا سامنا نہ کرنا پڑے، اپنی ٹیم کے ساتھ مل کر صوبے کے لوگوں کی بہتری کیلیے کام کروں گا۔

میڈیا سے گفتگو میں وزیر اعلیٰ سندھ کا یہ بھی کہنا تھا کہ سندھ کے لوگوں نے پیپلز پارٹی کو واضح مینڈیٹ دیا ہے لہٰذا عوام کو جواب دہ ہوں۔