عالمی مالیاتی ادارے آئی ایم ایف کا وفد 15 مارچ کے بعد پاکستان آئے گا جو موجودہ اور نئے قرض پروگرام پر مذاکرات کرے گا۔

اے آر وائی نیوز کو وزارت خزانہ کے ذرائع سے ملنے والی اطلاعات کے مطابق آئی ایم ایف کا وفد 15 مارچ کے بعد پاکستان آئے گا جو نئی حکومتم سے پاکستان کے موجودہ اور نئے قرض پروگرام پر بات کرے گا۔ آئی ایم ایف کے موجودہ قرض پروگرام کی آخری قسط سے متعلق بات کی جائے گی۔

ذرائع نے بتایا کہ موجودہ قرض پروگرام کے لیے پاکستان نے تمام اہداف حاصل کیے ہیں اور موجودہ قرض پروگرام کی آخری قسط میں پاکستان کو 1.1 ارب ڈالر ملنے کا امکان ہے۔

آئی ایم ایف معاشی استحکام کیلیے شہباز حکومت کے ساتھ کام کرنے کا منتظر

ذرائع کے مطابق نئی حکومت آئی ایم ایف کے ساتھ نئے قرض پروگرام پر بھی بات چیت کرے گی جس کے لیے نئے معاشی اہداف پر بھی بات چیت ہوگی۔ یہ نیا قرض پروگرام 6 سے 8 ارب ڈالر کا ہو سکتا ہے۔

سندھ ہائی کورٹ نے کراچی میں غیر قانونی تعمیرات میں ملوث افراد کیخلاف کارروائی کیلیے ہر ضلع میں علیحدہ تھانہ قائم کرنے کا حکم دیا ہے۔

اے آر وائی نیوز کے مطابق سندھ ہائیکورٹ میں کراچی میں غیر قانونی تعمیرات کیس کی سماعت ہوئی۔ 2 رکنی بینچ نے سماعت کی۔ اس موقع پر سندھ بلڈنگ کنٹرول اتھارٹی کی جانب سے جمع کرائی گئی رپورٹ میں انکشاف ہوا ہے کہ ایس بی سی اے کی جانب سے 10 سال میں 64 ہزار تعمیرات کی اجازت دی گئی۔

عدالت نے کہا کہ کراچی میں غیر قانونی تعمیرات سے متعلق کثیر تعداد میں کیسز آ رہے ہیں، ایس بی سی اے افسران کی ذمے داری ہے کہیں بھی غیرقانونی تعمیرات نہیں ہونی چاہیے لیکن وہ غیر قانونی تعمیرات روکنے میں بظاہر ناکام نظر آتے ہیں۔

ڈی جی ایس بی سی اے نے عدالت کو آگاہ کیا غیر قانونی تعمیرات کرنے والوں کیخلاف صرف شکایات درج کرا سکتے ہیں ان کے خلاف براہ راست مقدمہ درج نہیں کرا سکتے۔

سندھ ہائیکورٹ کے دو رکنی بینچ نے تحریری حکم نامہ جاری کرتے ہوئے غیر قانونی تعمیرات میں ملوث افراد کے خلاف کارروائی کے لیے الگ تھانہ قائم کرنے اور بلڈنگ پلان کی منظوری کے بغیر متعلقہ اداروں کو گیس، بجلی، پانی کے کنکشنز فراہم کرنے سے روک دیا۔

عدالت نے کہا کہ ایس بی سی اے کے پاس پورے کراچی میں مقدمات کے اندراج کیلیے ایک تھانہ ہے، سیکرٹری لوکل گورنمنٹ، قانون، داخلہ کراچی کے ہر ضلع میں ایس بی سی اے کا الگ پولیس اسٹیشن بنائیں اور دیگر اضلاع میں بھی غیر قانونی تعمیرات کرنے والوں کے خلاف مقدمات درج کرائیں۔

عدالت نے میئر کراچی، سیکریٹری لوکل گورنمنٹ، داخلہ اور سیکریٹری لینڈ سے جواب اور ڈی جی سندھ بلڈنگ کنٹرول اتھارٹی کے ڈائریکٹر جنرل کو پیش رفت رپورٹ کے ساتھ طلب کرتے ہوئے سماعت 24 اپریل تک ملتوی کر دی۔

سندھ ہائیکورٹ میں چار سالہ بچی سمیت دیگر شہریوں کی بازیابی کیس کی سماعت ہوئی عدالت نے بچی کو عید سے قبل بازیاب کرانے کا حکم دے دیا۔

اے آر وائی نیوز کے مطابق سندھ ہائیکورٹ میں چار سالہ بچی عائشہ سمیت دیگر شہریوں کی بازیابی کے لیے کیس کی سماعت ہوئی، جسٹس نعمت اللہ پھلپوٹو پر مشتمل دو رُکنی بینچ نے سماعت کی۔

سماعت کے موقع پر کمسن بچی کی جدائی میں غم سے چور والدین نے عدالت میں آہ وبکا کی اور عدالت کو بتایا کہ میری چار سالہ عائشہ 14 اگست کو مزار قائد سے لاپتہ ہوئی تھی، 6 ماہ میں اس کا کچھ پتہ نہیں چلا جب کہ پولیس بھی کوئی کارروائی نہیں کر رہی۔

اس موقع پر عدالت نے تفتیشی افسر سے استفسار کیا کہ انہوں نے بچی کی بازیابی کے لیے کیا اقدامات کیے؟ تفتیشی افسر نے عدالت کو آگاہ کیا کہ جے آئی ٹیز کے متعدد اجلاس ہوچکے ہیں۔ پراسیکیوٹر نے بتایا  کہ اس کیس میں عمیر نامی شخص کو گرفتار کیا گیا، اس سے تفتیش بھی ہوئی لیکن وہ ملوث نہیں۔

عدالت نے پولیس کو بچی کو عید سے قبل بازیاب کرانے کا ٹاسک دیتے ہوئے ڈی ایس پی سے کہا کہ بچی کو بازیاب کرانے کی ذمے داری آپ کی ہے۔

سندھ ہائیکورٹ نے بچی کی بازیابی کے لیے تصاویر سوشل میڈیا پر جاری کرنے اور جے آئی ٹیز اور پی ٹی ایف سیشنز کی ہدایات کیں۔

اسی عدالت میں سچل سے لاپتہ عبدالصمد کے اہلخانہ بھی پیش ہوئے اور عدالت کو آگاہ کیا کہ ان کا بچہ چار ماہ سے لاپتہ ہے لیکن پولیس اس کی تلاش میں تعاون نہیں کر رہی ہے۔

عدالت نے استفسار کیا کہ اب تک مقدمہ درج کیوں نہیں کرایا گیا؟ جس پر اہلخانہ نے بتایا کہ مقدمہ درج کرانے کی درخواست پر پولیس نے کہا کہ گھر بیٹھ جائیں، عبدالصمد 15 روز میں بازیاب ہو کر گھر آ جائے گا اگر نہ آیا تو اپنی مدعیت میں مقدمہ درج کریں گے۔

عدالت نے تفتیشی افسر کو مقدمہ درج کرنے کا حکم دیتے ہوئے بچے کے اہلخانہ کو ہدایت کی کہ وہ آج ہی نماز جمعہ کے بعد سچل پولیس اسٹیشن جائیں اور مقدمہ درج کرائیں اگر انہوں نے مقدمہ درج نہیں کیا تو ان کے خلاف کارروائی کی جائے گی، جس کے بعد سماعت 28 مارچ تک ملتوی کر دی گئی۔

ن لیگ سے تعلق رکھنے والے سینیٹر مشاہد حسین سید نے اسمبلی کی مخصوص نشستیں پی ٹی آئی کو دینے کی حمایت کر دی ہے۔

اے آر وائی نیوز کے مطابق سینیٹ کے اجلاس میں اظہار خیال کرتے ہوئے ن لیگ سے تعلق رکھنے والے سینیٹر مشاہد حسین سید نے کہا ہے کہ مخصوص نشستیں پی ٹی آئی کا حق ہیں اور انہیں ملنی چاہئیں۔

ان کا کہنا تھا کہ پی ٹی آئی کے دور حکومت میں نواز شریف کی رہائی کا مطالبہ کیا تھا بانی پی ٹی آئی کی رہائی کا سب سے پہلے مطالبہ بھی میں نے ہی کیا۔ عام انتخابات کے بعد اب عام معافی دی جانی چاہیے۔

مشاہد حسین سید نے مزید کہا کہ بلوچستان کے لاپتہ افراد پر کمیٹی میں رپورٹ پیش کی گئی، لاپتہ افراد کہیں کے بھی ہوں انہیں بازیاب کیا جائے، ایم کیو ایم کے 500 سے زائد افراد بازیاب ہو گئے، صرف 13 رہ گئے ہیں۔

واضح رہے کہ عام انتخابات سے قبل الیکشن کمیشن کی جانب سے پی ٹی آئی کے انٹرا پارٹی انتخابات کالعدم قرار دینے اور بلے کا انتخابی نشان واپس لینے کے باعث پی ٹی آئی امیدواروں نے آزاد حیثیت اور مختلف انتخابی نشانات کے ساتھ الیکشن لڑا تھا۔

نتائج کے بعد مخصوص نشستوں کے حصول کے لیے پی ٹی آئی کے حمایت یافتہ آزاد امیدواروں نے سنی اتحاد کونسل میں شمولیت اختیار کی تھی تاہم الیکشن کمیشن نے کونسل کو مخصوص نشستیں دینے سے انکار کرتے ہوئے یہ نشستیں دیگر جماعتوں کو الاٹ کر دیں۔

سنی اتحاد کونسل نے اپنی حاصل کردہ جنرل نشستوں کے تناسب سے مخصوص نشستوں کے حصول کے لیے قانون کا دروازہ کھٹکٹا لیا ہے اور عدالتوں میں درخواستیں دائر کر دی ہیں جو زیر سماعت بھی ہیں۔