وفاقی تحقیقاتی ادارے (ایف آئی اے) نے جعلی پاسپورٹ کے اجرا پر 7 افسران کو گرفتار کر لیا۔

تفصیلات کے مطابق افغانوں کو پاکستانی پاسپورٹ اجرا کے کیس میں پاسپورٹ اور نادرا کے 7 افسران کو گرفتار کیا گیا ہے جن میں 3 اسسٹنٹ ڈائریکٹر پاسپورٹ امیگریشن اور 4 نادرا افسران شامل ہیں۔

ایف آئی اے کا کہنا ہے کہ کارروائی میں 4 ایجنٹ اور 5 افغان شہری بھی گرفتار کیےگئے ہیں۔ یہ کارروائی نادرا حکام اور پاسپورٹ آفس کی شکایت پر کی گئی ہے۔

ایف آئی اے کے مطابق جعلی پاکستانی پاسپورٹ کا گروہ بین الاقوامی سطح پر سرگرم تھا۔ کیس میں اب تک 15ملزمان گرفتار کیے جا چکے ہیں جن سے تفتیش جاری ہے جب کہ مزیدگرفتاریوں کا بھی امکان ہے۔

مجلس وحدت المسلمین (ایم ڈبلیو ایم) کے سربراہ علامہ راجہ ناصر عباس کا کہنا ہے کہ پی ٹی آئی کے ساتھ ہمارا اتحاد خون کے آخری قطرے تک قائم رہے گا۔

اے آر وائی نیوز سے خصوصی گفتگو کرتے ہوئے ایم ڈبلیو ایم کے سربراہ علامہ راجہ ناصر عباس نے کہا کہ پی ٹی آئی ارکان اسمبلی کو ایم ڈبلیو ایم میں شمولیت پر خوش آمدید کہتے ہیں، مجلس وحدت المسلمین بانی پی ٹی آئی کی اپنی جماعت ہے وہ پارٹی سے متعلق جو چاہے فیصلے کرسکتے ہیں۔

انہوں نے کہا کہ روز اول سے بانی پی ٹی آئی کی غیر مشروط حمایت جاری رکھی ہے، مشکل وقت میں باوفا دوست بن کر ساتھ نبھائیں گے، بانی پی ٹی آئی جو بھی فیصلے کریں گے بلا مشروط من و عن قبول کریں گے۔

علامہ راجہ ناصر عباس نے کہا کہ پی ٹی آئی کے ساتھ ہمارا اتحاد آزاد خارجہ پالیسی، داخلی خود مختاری کی بنیاد پر ہے، ہمارا اتحاد عالمی طاقتوں کی غلامی سے انکار، مسلم ممالک سے تعلقات کی بنیاد پر ہے۔

انہوں نے کہا کہ ہمارا اتحاد سرحدوں کے تحفظ، گلگت بلتستان کے لیے آئینی حقوق کے حصول پر ہے اور پی ٹی آئی کے ساتھ ہمارا اتحاد خون کے آخری قطرے تک قائم رہے گا۔

سربراہ ایم ڈبلیو ایم نے کہا کہ بانی پی ٹی آئی کی قیادت میں پوری قوم مل کر خود مختار ریاست کے لیے کام کرے گی۔

الیکشن کمیشن نے لاہور سے ن لیگ کے 5 رہنماؤں کو کامیاب قرار دیدیا۔

الیکشن کمیشن نے ن لیگی رہنماؤں کی کامیابی کا نوٹیفکیشن جاری کر دیا جس کے مطابق این اے 118 لاہور سے حمزہ شہبازشریف کامیاب قرار پائے۔

این اے 119 لاہور سے مریم نواز کامیاب قرار پائیں۔ این اے 123 لاہور سے شہبازشریف کو کامیاب قرار دیا گیا۔ این اے 127 لاہور سے عطااللہ تارڑ کو کامیاب قرار دیا گیا۔

این اے 130 لاہور سے میاں نوازشریف بھی کامیاب قرار پائے ہیں۔

الیکشن میں کامیاب ہونے والے ایک اور آزاد امیدوار رانا فیاض نے ن لیگ میں شمولیت کا اعلان کردیا۔

رانا فیاض نے ن لیگ کے قائد نواز شریف پر اعتماد کا اظہار کیا جبکہ شہبازشریف سے نومنتخب رکن قومی اسمبلی وسیم قادرکی بھی ملاقات ہوئی، وسیم قادر پہلے ہی مسلم لیگ (ن) میں شمولیت اختیار کر چکے ہیں۔

سماجی رابطوں کی سائٹ ایکس پر مریم نواز نے لکھا کہ مکافات عمل کا شکار ہوئے تو میں نے سوچا خود احتسابی سے سوچ میں تبدیلی آئے گی لیکن بانی پی ٹی آئی نے آج جو باتیں کیں اس میں پھر وہی جھوٹ، الزامات اور بہتان ہے۔

مریم نواز نے لکھا کہ خیبر پختونخوا میں دھاندلی سے متعلق بہت سازی شکایات موصول ہوئی ہیں، گزشتہ 72 گھنٹے میں کے پی میں دھاندلی کے بہت سے ثبوت ملے ہیں۔

انہوں نے لکھا کہ اپنے لوگوں کو ہدایت کی ہے الیکشن کمیشن میں شکایات درج کروائیں، فافن بھی کے پی میں بڑے پیمانے پر دھاندلی کو دیکھے۔