لاہور :مسلم لیگ ن کی چیف آرگنائزر مریم نواز کا کہنا ہے کہ عمران خان اور اس کو مسلط کرنے والے پاکستان کے مجرم ہیں۔

تفصیلات کے مطابق مسلم لیگ ن کی چیف آرگنائزر مریم نواز نے سماجی رابطے کی ویب سائٹ ٹوئٹر پر اپنے بیان میں کہا کہ ماضی کے طاقتور لوگوں کے ریٹائر ہوکر حالات دیکھ لیں، سوچیں دور اقتدار میں کس طرح اختیارات کاناجائزاستعمال کررہے ہوں گے۔

مریم نواز کا کہنا تھا کہ نوازشریف چپ ہے لیکن اللہ کی قدرت سے سازشیوں کا گھناؤناچہرہ اور گٹھ جوڑ ہر روز رسوا ہو رہا ہے، عمران خان اور اس کو مسلط کرنے والے پاکستان کے مجرم ہیں اور قرارواقعی سزا کےمستحق بھی ہیں، ریاست انصاف کی منتظر ہے۔

سوچیں، انصاف کی سب سے بڑی کرسی پر بیٹھ کر ریاست کی تقدیر کے فیصلے ساسوں، دامادوں اور بچوں کو entertain کرنے کی خاطر یا انکے مالی مفادات کی خاطر ہورہے ہیں۔
دنیا کی تاریخ میں ایسا گھناؤنا عدالتی مذاق آج تک کسی ریاست کے ساتھ نہیں ہوا ہوگا۔ عمران اور اسکو کو مسلط کرنے والے پاکستان…

— Maryam Nawaz Sharif (@MaryamNSharif) April 29, 2023

یاد رہے دو روز قبل مسلم لیگ ن کی سینئر نائب صدر مریم نواز عمرہ ادائیگی کے بعد وطن واپس پہنچیں تھیں، مریم نواز چند روز میں اپنی سیاسی مصروفیات کا آغاز کریں گی۔

اسلام آباد : الیکشن کمیشن نے اہم انتخابی تیاریاں روکتے ہوئے بیلٹ پیپرز اور تصاویر والی ووٹرز لسٹیں فوری طورپر نہ چھاپنے کا فیصلہ کرلیا۔

تفصیلات کے مطابق پنجاب اسمبلی کےانتخابات کا 14مئی کوانعقاد ناممکن ہوگیا ، الیکشن کمیشن نے اہم انتخابی تیاریاں روک دیں۔

ذرائع نے بتایا کہ الیکشن کمیشن نے بیلٹ پیپرز اور تصاویر والی ووٹرز لسٹیں فوری طور پر نہ چھاپنے کا فیصلہ کرلیا ، کل تک بیلٹ پیپرز کی چھپائی شروع نہ ہوئی تو 14 مئی کو انتخابات کا انتظام نہیں ہوسکے گا۔

ذرائع نے کہا کہ الیکشن کمیشن کوبیلٹ پیپرز کی چھپائی اورترسیل کے لئے کم از کم 14 روز درکار ہوں گے، الیکشن کمیشن نے فنڈزکی عدم فراہمی کی وجہ سے بیلٹ پیپرز کی چھپائی نہ کی۔

الیکشن کمیشن کو بیلٹ پیپرز کی چھپائی اور ترسیل کے لئے کم از کم ڈیڑھ ارب روپے درکارہیں، الیکشن کمیشن نے صرف پنجاب اسمبلی کے لئے ساڑھے 7کروڑبیلٹ پیپرز چھاپنے ہیں۔

ذرائع کے مطابق الیکشن کمیشن نے تصاویر والی ووٹرلسٹیں بھی چھاپنی ہیں، انتخابات سے متعلق دو اہم امور کی تیاریاں روکی گئیں ہیں۔

خیال رہے سپریم کورٹ نے 14مئی کو پنجاب اسمبلی کے انتخابات کرانے کا حکم دے رکھا ہے۔

اسلام آباد : وفاقی حکومت نے پاسپورٹ ملنے کی مدت کا پرانا نظام بحال کردیا ، اب نارمل فیس کے ساتھ پاسپورٹ ایک ماہ کے بجائے 10روز میں مل جائے گا۔

تفصیلات کے مطابق وفاقی حکومت نے پاسپورٹ ڈلیوری کی مدت میں 3 ہفتوں کی تاخیر کا خاتمہ کرتے ہوئے پاسپورٹ ملنے کی مدت کا پرانا نظام بحال کرنے کے احکامات جاری کردیئے۔

ڈی جی امیگریشن اینڈ پاسپورٹ نے ڈلیوری مدت کی بحالی کا حکمنامہ جاری کردیا ، جس کے تحت نارمل فیس کے ساتھ پاسپورٹ ڈلیوری ایک ماہ کے بجائے 10 روز میں کی جائے گی۔

حکمنامے میں بتایا گیا کہ ارجنٹ فیس کے ساتھ ڈلیوری 10 کے بجائے 4 دنوں اور فاسٹ ٹریک کے ذریعے پاسپورٹ ڈلیوری 5 کے بجائے 2 روز میں ہو گی۔

خیال رہے درخواستوں میں اضافے کے باعث پاسپورٹ ڈلیوری میں تاخیر ہورہی تھی۔

قبل ازیں وزیراعظم شہباز شریف نے متعلقہ حکام کو درخواست دہندگان کی سہولت کے لیے نیشنل ڈیٹا بیس اینڈ رجسٹریشن اتھارٹی (نادرا) سینٹرز میں پاسپورٹ کاؤنٹرز قائم کرنے کی ہدایت کی۔

وزیراعظم نے کہا تھا کہ اس اقدام سے نہ صرف عام لوگوں کو سہولت ملے گی بلکہ قومی خزانے پر بوجھ بھی کم ہوگا۔

انہوں نے نادرا اور ڈائریکٹوریٹ جنرل آف امیگریشن اینڈ پاسپورٹ سے کہا ہے کہ وہ تعاون کو عملی جامہ پہنانے کے لیے اپنے وسائل کا اشتراک کریں اور پہلے سے منظور شدہ تمام نئے پاسپورٹ دفاتر کو نادرا مراکز میں کاؤنٹرز کے طور پر قائم کیا جائے گا۔