قومی احتساب بیورو (نیب) کراچی نے تھر کول واٹر پراجیکٹ میں ایک ارب 29 کروڑ روپے کی بے ضابطگیوں کی تحقیقات شروع کردی ہے۔

اے آر وائی نیوز کے مطابق نیب نے تھر کول واٹر پراجیکٹ میں ایک ارب 29 کروڑ روپے کی بے ضابطگیوں کی تحقیقات شروع کردی ہے اور محکمہ آبپاشی کے سیکریٹری کو خط لکھ کر ریکارڈ طلب کرلیا ہے۔

اس حوالے سے نیب حکام کی جانب سے محکمہ آبپاشی کے سیکریٹری کو لکھے گئے خط میں کہا گیا ہے کہ پراجیکٹ میں کتنی رقم خرچ ہوئی اور کام کے بل کس نے پاس کیے؟ یہ تمام ریکارڈ دیا جائے۔ اس کے علاوہ بل پاس کرنے والے افسران کے نام اور رقم کی تفصیلات بھی بتائی جائیں۔

نیب نے مذکورہ منصوبے میں سال 2016۔17 کے دوران خرچ رقم کی تفصیلات بھی طلب کی ہیں۔

نیب کا کہنا ہے کہ محکمہ آبپاشی کو خط لکھے جانے کے باوجود تاحال وہاں سے کوئی ریکارڈ فراہم نہیں کیا گیا ہے۔

مسلم لیگ ق کے صدر چوہدری شجاعت حسین کے بیٹے نے الزام عائد کیا ہے کہ چوہدری شجاعت کو خاندان کے اندر سے دھوکا دیا گیا۔

چوہدری شجاعت حسین کے بیٹے شافع حسین نے اے آر وائی نیوز کو خصوصی انٹرویو دیا ہے جس میں ان کا کہنا ہے کہ ان کے والد کو خاندان کے اندر سے دھوکا دیا گیا۔ چوہدری شجاعت نے کوشش کی کہ خاندان میں خاندان میں سیاسی صلح ہو مگر دوسری طرف سے ایسی کوئی خواہش نہیں تھی۔

شافع حسین نے کہا کہ پہلے پرویز الہٰی نے خود کہا کہ پی ڈی ایم کو میری وزارت اعلیٰ کے لیے منائیں اور جب چوہدری شجاعت نے سب کو منا لیا تو پرویز الٰہی آخری منٹ میں بنی گالہ چلے گئے۔ اگر انہیں دوسری طرف ہی جانا تھا تو دعائے خیر نہ کراتے۔

ق لیگی رہنما نے کہا کہ پرویز الہٰی تو یہی کہتے ہیں کہ ایسا کرنے کے لیے انہیں اس وقت کے آرمی چیف قمر جاوید باجوہ نے کہا لیکن سوال یہ ہے کہ کب کہا؟ قمر جاوید باجوہ کا فون آیا تھا تو پارٹی صدر چوہدری شجاعت کو تو بتا دیتے۔ چوہدری شجاعت نے جب پوچھا کہ ایسا کیوں کیا تو پرویز الہٰی نے کہا کہ سمجھ نہیں آئی۔

ان کا کہنا تھا کہ پرویز الہٰی نے ساری پی ڈی ایم کو کہا کہ میں بس عمران خان کو ٹال کر آتا ہوں۔ یہ ٹالنے گئے تو سارے ان کی واپسی کا انتظار کر رہے تھے لیکن پتہ چلا کہ وہ تو دوسری طرف چلے گئے ہیں۔ یہ تو خاندان کے اندر رہ کر ہمیں دھوکا دینے والی بات کی گئی۔

شافع حسین نے کہا کہ سیاسی خاندان اکٹھے ہوں تو فائدہ ہوتا ہے اور ہمیں بھی اکٹھے چلنے میں کوئی اعتراض نہیں، لیکن ایک شخص خود کو برتر سمجھتا ہے اور وہ شخص مونس الہٰی ہے۔ مونس الہٰی کا شجاعت حسین کے سافٹ ویئر اپ ڈیٹ والا بیان غیرمناسب ہے۔ مونس نے جن سے سیاست سیکھی اب ان ہی کے بارے میں ایسی بات کرتے ہیں۔

ق لیگی رہنما کا کہنا تھا کہ شجاعت حسین نے پہلی بار پرویز الہٰی کے کہنے پر پی ڈی ایم کے سامنے اسٹینڈ لیا۔ آصف زرداری بھی کہہ رہے تھے کہ انہوں نے بڑی مشکل سے نواز شریف کو پرویز الٰہی کیلیے منایا تھا۔ نظر آرہا تھا ایم پی ایز کس طرف جانا چاہتے ہیں اس لیے زیادہ کوشش نہیں کی۔

ان کا کہنا تھا کہ اب ہمارے کچھ ایم پی ایز سے رابطہ ہے لیکن کچھ اور آپشنز بھی ہیں۔ ایم پی ایز سے بات نہ بنی تو ایمرجنسی اور پارٹی سے نکالنے کے آپشنز بھی ہیں۔

شافع حسین نے کہا کہ شریف خاندان پر اعتبار نہ کرنے والی بات 20 سال پرانی ہے، اب حالات بدل چکے ہیں۔ اگر شریف خاندان برا تھا تو پرویز الہٰی نے کیوں کہا تھا کہ ن لیگ سے وزارت اعلیٰ کی بات کریں۔

سال 2022 سندھ کے تعلیمی شعبے کے لیے بدترین سال رہا اور نجی ادارے کے سروے کے مطابق محکمہ تعلیم کرپٹ ترین ادارہ قرار پایا۔

اے آر وائی نیوز کے مطابق تیزی سے گزرتا سال 2022 سندھ کے تعلیمی شعبے کے لیے بد ترین سال رہا ہے اور ایک نجی ادارے کے سروے میں محکمہ تعلیم کرپٹ ترین ادارہ قرار دیا گیا ہے۔ اس سال بھی اسکولوں سے گھوسٹ اساتذہ کا خاتمہ نہ ہوسکا۔

سال 2022 میں سندھ میں تعلیم کے لیے 356 ارب روپے سالانہ بجٹ میں رکھے گئے تھے۔ اس کے باوجود سال رواں صوبے میں تعلیم کے حوالے سے بدقسمت ثابت ہوا اور اسکول ڈراپ آؤٹس کی تعداد بڑھ گئی۔ 5 ہزار اسکولوں کی عمارتیں آج بھی مخدوش ہیں۔

سیلاب آیا تو صوبے میں موجود 49 ہزار اسکولوں میں سے 20 ہزار کو مکمل تباہ کردیا جس کے باعث 23 لاکھ طلبہ سے تعلیمی سہولیات چھن گئیں اور ان کے تعلیمی مستقبل پر سوالیہ نشان لگ گیا۔ تاحال ان کی بحالی کے لیے کوئی موثر اقدامات نظر نہیں آ رہے ہیں۔

اس سال بھی سرکاری اسکولوں کے اساتذہ ملازمت مستقل کرنے کا مطالبہ لیے سڑکوں پر احتجاج کرتے رہے لیکن 2017 میں بھرتی ہونے والے ہیڈ ماسٹرز اور 10 سال سے ملازمت کرتے کنٹریکٹ اساتذہ کا یہ احتجاج رائیگاں گیا۔

ایک جانب کنٹریکٹ اساتذہ کا ناکام احتجاج تھا تو دوسری جانب سندھ حکومت کو 2022 میں اسکولوں سے گھوسٹ اساتذہ کا خاتمہ کرنے میں بھی ناکامی کا منہ دیکھنا پڑا۔ اس سال بھی کئی اساتذہ کو بغیر حاضری تنخواہ وصول کرنے پر ملازمتوں سے برطرف کیا گیا۔

سندھ میں اعلیٰ تعلیم کی بات کریں تو پاکستان کی سب سے بڑی یونیورسٹی جامعہ کراچی بھی سنگین مالی بحران کا شکار رہی۔ انٹرمیڈیٹ کے امتحانات میں شہر قائد سمیت سندھ کے درجنوں کالج کے تمام طلبہ فیل قرار پائے۔ سندھ کے تعلیمی بورڈ کے امتحانات ہو یا پروفیشنل جامعات و کالجز کے معاملات، تمام امور انتظامی بدنظمی دیکھنی میں آئی۔