کراچی : ایم کیو ایم پاکستان نے ایک سے دو روز میں کراچی میں انتخابی دفاتر کھولنے کا فیصلہ کرتے ہوئے ایم کیو ایم قیادت نے سینٹرل آرگنائزنگ کمیٹی کو عوامی رابطہ مہم تیز کرنے کی ہدایت کردی۔
تفصیلات کے مطابق عام انتخابات کی تاریخ کا اعلان ہوتے ہی ایم کیو ایم پاکستان نے عام انتخابات کے حوالے سے تیاریاں تیز کردی اور سینٹرل آرگنائزنگ کمیٹی کو عوامی رابطہ مہم تیز کرنے کی ہدایت جاری کی۔
ذرائع نے بتایا ہے کہ ایم کیو ایم نے ایک سے دو روز میں کراچی میں انتخابی دفاتر کھولنے کا بھی فیصلہ کیا ہے ، کراچی میں سو سے زائد انتخابی دفاتر کھولے جائیں گے۔
ذرائع کا کہنا تھا کہ ایم کیو ایم نے آئندہ دو ماہ میں تین جلسے کرنے کا فیصلہ کرتے ہوئے لیاری میں بھی انٹری ڈالنے پر غور شروع کردیا ہے۔
ذرائع کے مطابق 4 نومبر کو برنس روڈ پر عوامی رابطہ مہم کے حوالے سے پروگرام کیا جائے گا اور 26 نومبر کو ایم کیو ایم کورنگی میں میدان سجائے گی جبکہ کورنگی کے بعد انتخابی مہم کے حوالے سے دو دسمبر کو گلشن اقبال اور اسکے بعد لیاری میں عوامی طاقت کا مظاہرہ کیا جائے گا۔
ذرائع نے کہا ہے کہ رواں ہفتے ایم کیوایم میں مختلف برادریاں اور اہم سماجی شخصیات بھی شمولیت اختیار کریں گی۔
