لاہور : ناجائز منافع خوروں نے مرغی کے گوشت کی قیمتوں میں من مانا اضافہ کردیا، نئے نرخ 602روپے فی کلو ہوگئے، شہریوں نے متعلقہ حکام سے نوٹس لینے کی اپیل کردی۔
ملک بھر میں مہنگائی کا جن بوتل سے باہر آگیا۔ اشیائے خورد ونوش کے ساتھ ساتھ مرغی کے گوشت کی قیمت کو بھی پر لگ گئے۔ قیمتوں میں ہوشربا اضافے سے عوام کو شدید مشکلات کا سامنا ہے۔
ذرائع کے مطابق لاہور میں ایک مرتبہ پھر مرغی کی قیمت 600 روپے فی کلو سے تجاوز کر گئی، نرخ 602 روپے تک پہنچ گئے جبکہ چکن کا قیمہ 1100 روپے فی کلو سے بھی بڑھ گیا۔
شہریوں کا کہنا ہے کہ چکن کا ریٹ تو اب گائے کے گوشت کے برابر ہوگیا ہے، دکاندار خود بھی گوشت کی بڑھتی قیمتوں سے پریشان ہیں۔
دکاندارں کا کہنا ہے کہ ریٹ بڑھتا ہے تو گاہک خریداری چھوڑ دیتا ہے، زیادہ تر لوگ مرغی کی بجائے گائے کے گوشت کو ترجیح دے رہے ہیں۔
شہریوں نے انتظامیہ سے اپیل کی ہے کہ مرغی کے گوشت کی قیمتوں میں توازن رکھنے کیلئے پولٹری مافیا کو کنٹرول کیا جائے۔
