پاکستان تحریک انصاف کے رہنما فواد چوہدری نے کہا ہے کہ اتنےحالات خراب ہیں توپولیس بتائے اب تک کتنے دہشت گرد اٹھائے ہیں۔
پی ٹی آئی رہنما فواد چوہدری نے میڈیا سے گفتگو کرتے ہوئے کہا کہ حکومت کا کہنا ہے پاکستان کولیپس کر چکا اس لئے الیکشن نہیں کرا سکتے، چیف جسٹس نےکہا 8 اکتوبر کی تاریخ کس نے دی الیکشن کمیشن کے پاس جواب نہیں تھا، ان کی باتوں سے لگتا ہے کہ یہ الیکشن نہیں کراپائیں گے۔
انہوں نے کہا کہ یہ کہتے ہیں الیکشن کے لیے پولیس نہیں تو آپ مجھے بتائیں پشاور دھماکے کی کیا اپڈیٹ ہے اب تک کسی کو پکڑا ہے، اتنے حالات خراب ہیں توپولیس بتائے اب تک کتنے دہشت گرد اٹھائے ہیں۔
فواد چوہدری کا کہنا تھا کہ کل پاکستان کے ایٹمی پروگرام پر کانگریس ہائیرنگ ہونی ہے، جس ملک کے 10 ملین ڈالر نہیں الیکشن کرانے کیلئےکیا اسے ایٹمی پروگرام رکھنا چاہئے۔
انہوں نے کہا کہ حکومت بہت ہی خطرناک بیان دے رہی ہے، حکومت کی جانب سے ایسے بیان کی جتنی مذمت کی جائےکم ہے، سپریم کورٹ میں تقسیم ڈالنے کی کوششوں کی شدید مذمت کرتے ہیں، اگر وکلا تحریک کا آغاز ہوتا ہے تو ہم اسکے پیچھے کھڑے ہونگے، ساری قوم سپریم کورٹ کے پیچھےکھڑی ہے۔
فوادچوہدری کا کہنا تھا کہ تین دو اور چار تین والا مسئلہ حل ہوگیا، فیصلہ تین دو کا تھا اس پر عمل درآمد کر دیا ہے، اب بینچ دوسرے حصےکی طرف جا رہا ہے، بینچ نے الیکشن کمیشن سے پوچھا الیکشن کیوں نہیں کرارہے تو الیکشن کمیشن نے جواب دیا پاکستان کولیپس کرگیا ہمارے پاس پیسے نہیں ہیں۔
فواد چوہدری کا مزید کہنا تھا کہ عدالت سے درخواست کرتاہوں حکومتی مؤقف لائیو دکھائیں، حکومت کہہ رہی ہے کہ اتنی زیادہ دہشت گردی ہے کہ کنٹرول نہیں کرسکتے، پیسوں کا بحران ہے پیسے نہیں دے سکتے۔
