اسلام آباد: پاکستان میں سبزیوں کی قیمتوں میں اضافے کی بڑی وجہ برآمدات میں اضافے کو قرار دے دیا گیا، نومبر اور دسمبر میں سبزیوں کی برآمدات میں تاریخی اضافہ ہوا۔
تفصیلات کے مطابق پاکستان میں سبزیوں کی قیمتوں میں اضافے کی وجوہات سامنے آگئیں۔
دستاویز میں بتایا گیا کہ پاکستان میں سبزیوں کی قیمتوں میں اضافے کی بڑی وجہ برآمدات میں اضافہ ہے، نومبر اور دسمبر دوہزار تیئیس میں سبزیوں کی برآمدات میں تاریخی اضافہ ہوا۔
دستاویز میں کہنا تھا کہ دسمبرمیں سبزیوں کی برآمدات دوسو بتیس فیصد بڑھ کر بانوے ہزار میٹرک ٹن ہو گئی جبکہ دسمبر میں سبزیوں کی برآمدات کا حجم گیارہ ارب چھیالیس کروڑ روپے رہا۔
دستاویز کے مطابق گزشتہ مالی سال کے دسمبر میں برآمدات تین ارب پینتالیس کروڑ روپے تھیں جبکہ نومبر کے مقابلے دسمبر میں سبزیوں کی برآمدات چھیاسی فیصد بڑھ کر چھ ارب روپے سے زائد ہو گئیں۔