ریاض: سعودی عرب کے شہر مدینہ منورہ میں جبل احد کے مقام پر سعودی خاتون فوڈ ٹرک پر آئسکریم فروخت کر رہی ہیں، ان کے اس کاروبار کے لیے گورنر مدینہ اور نائب گورنر نے تعاون کیا۔
سعودی ویب سائٹ کے مطابق سعودی عرب مدینہ منورہ میں جبل احد کے مقام پر جہاں لاکھوں افراد زیارت کے لیے آتے ہیں، ایک سعودی خاتون فوڈ ٹرک پر آئسکریم فروخت کر رہی ہیں۔
سعودی خاتون امیرہ کا کہنا ہے کہ ان کے خیال میں اس میں کوئی قباحت نہیں، ہم جس دور میں زندگی گزار رہے ہیں یہ خواتین کو اپنے قدموں پر کھڑے کرنے والا دور ہے، ہماری قیادت خواتین کو زندگی کے مختلف شعبوں میں قسمت آزمائی کے موقع فراہم کر رہی ہے۔
امیرہ نے بتایا کہ وہ 4 ماہ سے فوڈ ٹرک پر آئسکریم فروخت کر رہی ہیں اور لوگ ان کی حوصلہ افزائی کر رہے ہیں۔
انہوں نے کہا کہ کرونا وائرس وبا کی وجہ سے لاک ڈاؤن میں کمی کے بعد انہوں نے آئس کریم فروخت کرنے کا سلسلہ شروع کیا۔
امیرہ کا کہنا تھا کہ وہ صفائی کا اہتمام اور وائرس سے بچاؤ کی پابندی کرتی ہیں اور گاہکوں سے بھی اس کی پابندی کرواتی ہیں۔ مجھے خوشی ہے کہ لوگ اس کو پسند کر رہے ہیں۔
انہوں نے بتایا کہ گورنر مدینہ اور نائب گورنر نے فوڈ ٹرک سے آئس کریم کا کاروبار شروع کرنے میں تعاون کیا جس پر وہ ان شکر گزار ہیں۔
