بھارتی دورے میں انگلینڈ کرکٹ ٹیم کی جانب سے شیف لانے کی خبروں پر ویریندر سہواگ زہریلی باتیں کرنے پر اتر آئے۔
انگلینڈ کی ٹیم اس خطرے کے پیش نظر کے طویل دورہ بھارت میں پلیئرز بیمار نہ پڑجائیں اپنے ساتھ شیف لانے کا فیصلہ کیا ہے۔ یہ بات سابق بھارتی بلے باز ویریندر سہواگ کو ہرگز پسند نہ آئی اور وہ انگلینڈ کرکٹ ٹیم پر طنز کے نشتر برسانے لگے۔
انھوں نے سوشل میڈیا پلیٹ فارم ’ایکس‘ پر اپنی پوسٹ شیئر کرتے ہوئے لکھا کہ ’یہ ضرورت کک کے جانے کے بعد پڑی، آئی پی ایل میں نہیں پڑے گی۔‘
سہواگ کا اشارہ سابق انگلش کرکٹر ایلسٹر کک کی طرف تھا، انھوں نے کک ( لفظی معنی کھانا پکانا) کے نام کی وجہ سے ان کی ریٹائرمنٹ کا ذکر کیا۔
سابق کرکٹر نے انگلینڈ پر یہ بھی طنز کیا کہ آئی پی ایل میں انھیں کسی باورچی کی ضرورت نہیں پڑے گی۔ سہواگ کا اشارہ اس طرف تھا کہ انڈین پریمیئر لیگ میں انگلش پلیئرز ساتھ باورچی لے کر نہیں آتے۔
ایک اور بھارتی صارف نے ’ایکس‘ پر لکھا کہ ’کوئی مسئلہ نہیں کہ ہمارے پاس اچھے شیف ہیں، ایشون اور جڈیجا انگلینڈ کو اچھی طرح سے پکائیں گے۔‘
واضح رہے کہ انگلینڈ کی کرکٹ ٹیم طویل دورہ بھارت کے لیے رواں ماہ آئے گی جہاں وہ ساتھ ہفتوں کے قیام کے دوران 5 ٹیسٹ میچز کھیلے گی۔
