پاکستان کے سابق فاسٹ بولر عاقب جاوید نے آسٹریلیا کے خلاف ٹیسٹ سیریز میں شاہین آفریدی کے ساتھ نوجوان بولر خرم شہزاد کو نئے گیند سے اٹیک کرنے کا مشورہ دیا ہے۔
اے آر وائی نیوز کے پروگرام اسپورٹس روم میں گفتگو کرتے ہوئے عاقب جاوید نے کہا کہ دورہ آسٹریلیا میں پاکستان کو فاسٹ بولرز کا چیلنج درپیش ہوگا کیونکہ نسیم شاہ اور حارث رؤف کی غیرموجودگی میں شاہین کے ساتھ کوئی دوسرا ایسا بولر نہیں ہے جو دباؤ بنا کر رکھے۔
عاقب جاوید کا کہنا ہے، آسٹریلیا میں شاہین شاہ آفریدی کے ساتھ خرم شہزاد سے نئی بال کروانی چاہیے، وہ ایسے فاسٹ بولر ہیں جن کے پاس سوئنگ، رفتار اور ٹیلنٹ موجود ہے۔ pic.twitter.com/M7JBHxL3S0
— Najeeb ul Hasnain (@ImNajeebH) November 29, 2023
انہوں نے کہا کہ ہم نے ورلڈکپ میں بھی دیکھا کہ ایک طرف سے شاہین نے میڈن اوور کے ذریعے پریشر بنایا تو دوسری طرف مختلف بولرز آزمائے گئے جس سے پریشر ختم ہوتا رہا اس لیے سب سے بڑا چیلنج یہی ہوگا کہ شاہین کے ساتھ نئے گیند سے کون دوسرا بولر ہوگا۔
سابق فاسٹ بولر نے مشورہ دیا کہ خرم شہزاد نئے گیند کا اچھا انتخاب ہو سکتا ہے اس کے پاس سوئنگ اور رفتار ہے اور وہ ٹیلنٹڈ بھی ہے۔
عاقب جاوید نے کہا کہ محمد حفیظ جب ڈائریکٹر بنے تو مجھے کوئی مسئلہ نہیں تھا لیکن جب وہ ہیڈکوچ بنے تو مجھے اس پر اعتراض ہے کیونکہ وہ پروفیشنل ازم اور سسٹم کو بہتر بنانے کی باتیں کر رہے تھے اور پھر خود ہی کوچ بن گئے یہ فیصلہ ان کے لیے خود بھی صحیح ثابت نہیں ہوگا۔
