کراچی: شہر قائد میں تعینات اعلیٰ پولیس افسر کے بیٹے نے مختلف علاقوں میں ہوائی فائرنگ کر کے قانون روند ڈالا۔
تفصیلات کے مطابق کراچی میں ڈی آئی جی اظفرمہیسر کے بیٹے سرعام فائرنگ کرتے پائے گئے، عاشر مہیسر کی مختلف علاقوں میں ہوائی فائرنگ کی ویڈیو سوشل میڈیا پر وائرل ہو گئی ہے۔
ڈی آئی جی کے بیٹے نے چلتی گاڑی سے بھی ہوائی فائرنگ کی، عاشر مہیسر بلاخوف و خطر مختلف ہتھیاروں سے ہوائی فائرنگ کرتا رہا، ویڈیو میں نوجوان کو مختلف ہتھیاروں سے ہوائی فائرنگ کرتے دیکھا جا سکتا ہے۔
- Advertisement -
پولیس کا کہنا ہے کہ ویڈیوز کچھ عرصہ پرانی ہیں، واقعے کی تحقیقات کر رہے ہیں، ڈی آئی جی کے بیٹے نے اپنے فیس بک پیج پر ہتھیاروں اور مسلح افراد کے ساتھ اپنی تصویریں بھی پوسٹ کر رکھی ہیں۔
پولیس کا کہنا ہے کہ وائرل ویڈیوز پر ایف آئی اے سائبر کرائم کو شکایت کر دی گئی ہے۔
