کراچی : منگھوپیر سلطان آباد میں شہری اور تین ملزمان کے درمیان فلمی انداز میں گولیاں چل گئی تاہم شہری کی گولی سے زخمی ہونے والا ملزم پکڑا گیا۔
تفصیلات کے مطابق کراچی کے علاقے منگھو پیر سلطان آباد میں شہری اور 3 ملزمان کے درمیان فائرنگ کا تبادلہ ہوا، جس میں ایک ملزم شہری کی گولی سے زخمی ہوگیا۔
شہری کے ہاتھوں ڈاکو کے زخمی ہونے کے واقعے کی سی سی ٹی وی فوٹیج اے آر وائے نیوز نے حاصل کرلی، ویڈیو میں 3 ملزمان کو 2 موٹرسائیکلوں پر آتے دیکھا جاسکتا ہے، 2ملزمان شہری کے پیچھے بھاگے تو شہری گاڑی کے پیچھے چھپ گیا۔
جس کے بعد ویڈیو میں ملزم اور شہری کو ایک دوسرے پر گولیاں چلاتےدیکھاجاسکتا ہے ، شہری کی چلائی گولی سے ملزم زمین پر گر گیا تو شہری نے دوبارہ گولی چلائی تاہم فائرنگ ہوتے ہی ایک ملزم موٹر سائیکل چھوڑ کر بھاگ گیا۔
ویڈیومیں زخمی ملزم کو بھی پیدل فرار ہونے کی کوشش کرتے دیکھا گیا لیکن پولیس نے ملزم کو زخمی حالت میں اسلحہ سمیت گرفتار کرلیا اور ملزم کےدیگر 3ساتھی فرار ہونے میں کامیاب ہوگئے۔