اس میں کوئی دو رائے نہیں کہ دودھ از خود ایک مکمل غذا ہے اس میں وہ تمام غذائی اجزاء پائے جاتے ہیں جو آپ کی صحت کو برقرار رکھنے کے لئے درکار ہیں۔
طبی ماہرین کے مطابق اگر دودھ میں چند چیزیں ملا کر نوش کیا جائے تو اس کی افادیت غذائیت اور طاقت میں مزید اضافہ ہوجاتا ہے، اسے گولڈن ملک یا سنہرا دودھ کہتے ہیں۔
جی ہاں !! اسے گولڈن ملک یا سنہرا دودھ کہتے ہیں، ہلدی ملے دودھ کو گولڈن ملک کہا جاتا ہے، یہ دودھ جوڑوں کے درد کے لئے خاص طور پر مفید ہے۔
اے آر وائی ڈیجیٹل کے پروگرام گڈ مارننگ پاکستان میں شوبز کی معروف اداکارہ کرن خان نے گولڈن دودھ بنانے اور اس کے فوائد کے متعلق آگاہ کیا جس کی تصدیق ڈاکٹر ام راحیل نے بھی کی۔
انہوں نے بتایا کہ یہ دودھ پینا میری روٹین میں شامل ہے، اس کو بنانے کا طریقہ یہ ہے کہ ایک کپ نیم گرم دودھ میں تھوڑی سے تازہ ہلدی آدھا چمچ گھی ایک ایک چٹکی الائچی پاؤڈر اور پسی پوئی کالی مرچ ۔ مٹھاس کیلئے آدھا چمچ چینی یا شہد حسبِ ذائقہ ملائیں، صحت بخش گولڈن ملک تیار ہے اسے رات سونے سے قبل نیم گرم استعمال کریں۔
اس موقع پر ڈاکٹر ام راحیل نے بتایا کہ یہ دودھ ہر بیماری یا زخم کی تکلیف دور کرنے کیلئے انتہائی مفید اور کارآمد ہے۔
اس کے علاوہ ہڈیاں مضبوط کرتا ہے، شوگر اور بلڈ پریشر کنٹرول کرنے میں بھی مدد دیتا ہے، قوتِ مدافعت اور معدے کی طاقت بڑھاتا ہے لہٰذا یہ دودھ کئی امراض سے بچانے میں مددگار ہے۔
