پاکستان شوبز انڈسٹری کی معروف اداکارہ حرا خان نے آڈیشن کے وقت اپنے ساتھ پیش آئے واقعے سے مداحوں کو آگاہ کیا۔
حرا خان کا ایک ویڈیو کلپ سوشل میڈیا پر وائرل ہورہا ہے جس میں وہ نجی میگزین کو انٹرویو دیتے ہوئے آڈیشن کے وقت پیش آئے واقعے کا احوال بتارہی ہیں۔
سوشل میڈیا پر وائرل ہونے والے کلپ میں انہوں نے کسی کا نام لئے بغیر آڈیشن کے نام پر دیئے گئے دھوکے سے متعلق بتایا، کہ کس طرح انڈسٹری کے تجربے کار فنکار نے انہیں جعلی آڈیشن کے لیے تجویز کیا۔
حرا خان نے کہا کہ جب میں ڈرامہ سیریل ’میرے ہمسفر‘ کی ریکارڈنگ کروا رہی تھی، اس وقت ایک ساتھی فنکار، جن سے سیٹ پر ملاقات ہوئی تھی، نے ایک ہدایت کار کا نمبر دیا اور کہا کہ انہیں نئے پروجیکٹ کے لیے لڑکی کی ضرورت ہے، ان سے رابطہ کرلیں۔
میرے رابطہ کرنے پر مذکورہ ہدایت کار نے مجھ سے میرے کام کے بارے میں پوچھنے کے بجائے میری تصاویر مانگیں اور آڈیشن کے لیے آنے کے لئے کہا۔
اداکارہ نے کہا کہ جب میں نے ان سے سہ پہر کا وقت مقرر کرنے کا کہا تو انہوں نے مجھے رات 11 بجے بلوانے پر زور دیا۔
ہدایت کار کا کہنا تھا کہ آپ کا اسکرین ٹیسٹ ہو گا اور اُسی کی بنیاد پر سلیکشن ہوگی، اسکرین ٹیسٹ کے لیے آپ کو بولڈ لباس زیب تن کرنا ہو گا اور کہا کہ آپ کا آڈیشن خفیہ رکھا جائے گا، جو صرف پروڈیوسرز دیکھیں گے۔
کیا دنیا کبھی امن کی طرف لوٹے گی؟ حرا خان موجودہ صورتحال سے دلبرداشتہ
حراخان کا مزید کہنا تھا کہ مذکورہ ہدایت کار کی باتیں سن کر میں شک میں آگئی اور ایک اور ہدایت کار کو فون کیا اور معلوم کیا کہ کیا اس طرح بھی آڈیشنز ہوتے ہیں تو انہوں نے وہاں جانے سے قطعاً منع کردیا اور کہا یہ ضرور دھوکا ہے۔
