اسلام آباد: عالمی وبا کی تازہ لہر کے باعث وفاقی سرکاری اسپتالوں میں کورونا مریضوں کے لیے بیڈز کم پڑنے لگے ہیں۔

ترجمان پولی کلینک ڈاکٹر جبار بھٹو کے مطابق کورونا مریضوں کے لیے وارڈز میں گنجائش ختم ہورہی ہے، پولی کلینک میں مریضوں کیلئے ایک اور آئیسولیشن وارڈ مختص کیا گیا ہے، اس کے علاوہ مزید37بیڈ بھی مختص کیے، کورونا کی 3لہروں میں370 ہیلتھ ورکرز متاثر ہوچکے ہیں۔ 100ڈاکٹرز، 120نرسز اور 150پیرامیڈکس پازیٹو آئے۔

ڈاکٹرجباربھٹو کا کہنا ہے کہ کورونا کی تیسری لہر میں42ڈاکٹر کا کورونا ٹیسٹ مثبت آیا۔ جبکہ 72نرسز اور 68پیرامیڈکس وبا کا شکار ہوئے، کورونا کے تمام متاثرین کو ہرممکن طبی امداد فراہم کی جارہی ہے۔

کرونا کی تیسری لہر خطرناک، اسپتالوں‌ میں‌ گنجائش ختم، ملک بند نہیں‌ کرسکتے، عمران خان

ادھر ترجمان پمزڈاکٹروسیم خواجہ نے بتایا کہ پمزاسپتال میں کورونا کے 123 مریض زیرعلاج ہیں، مریضوں کیلئے163 بیڈزمختص ہیں، زیرعلاج13مریضوں کی حالت تشویشناک ہے۔

ترجمان کا مزید کہنا تھا کہ کوروناآئیسولیشن وارڈز میں گنجائش ختم ہونے والی ہے، کورونا مریضوں کیلئے مزید وارڈز تیار کیے جارہے ہیں، مریضوں کے لیے مزید200 بیڈز مختص ہوں گے۔

اسلام آباد : وفاقی دارلحکومت میں کورونا بے قابو ہوگیا اور مثبت کورونا کیسز کی شرح ریکارڈ سطح پر پہنچ گئی، ایک دن میں 856 کورونا کیسز سامنے آئے۔

تفصیلات کے مطابق وفاقی دارالحکومت میں کورونا کیسز میں اضافے کا سلسلہ جاری ہے، 24 گھنٹے میں مثبت کیسز کی شرح 15.9 فیصد ریکارڈ کی گئی۔

ڈی ایچ او ڈاکٹر زعیم ضیا کا کہنا ہے کہ اسلام آباد میں 24 گھنٹے میں 856کورونا کیسز رپورٹ ہوئے ، اب تک مجموعی طور پر 56 ہزار 460 کیسز اور 561 اموات ہوچکی ہیں۔

ڈاکٹر زعیم ضیا نے بتایا کہ 24 گھنٹے میں کورونا کے 2مریض جاں بحق ہوئے جبکہ کورونا کیلئے مختص 64 فیصد وینٹی لیٹرز زیر استعمال ہیں۔

یاد رہے وفاقی دارالحکومت اسلام آباد میں کورونا وائرس کے کیسز میں اضافے کے پیش نظر متعدد علاقوں میں اسمارٹ اور مکمل لاک ڈاؤن نافذ کردیا گیا ہے۔

جی نائن 2، جی ٹین 3، جی ٹین 2، جی الیون 2، جی الیون 1 اور آئی ایٹ 3 میں اسمارٹ لاک ڈاؤن جبکہ ڈی ایچ اے ٹو، سوہان گارڈن، پی ڈبلیو ڈی، بہارہ کہو اور بنی گالہ میں مکمل لاک ڈاؤن کردیا گیا ہے۔

خیال رہے ملک میں کورونا کی تیسری لہر خطرناک صورت اختیار کرتی جارہی ہے، گزشتہ 24 گھنٹوں کے دوران ساڑھے 4 ہزار سے زایئد کیسز رپورٹ ہوئے اور 41 مریضوں کا انتقال ہوا۔