امیر جماعت اسلامی پاکستان سراج الحق کا کہنا ہے کہ پی ٹی آئی اور پی ڈی ایم عالمی اسٹیبلشمنٹ کے ایجنٹوں کا ٹولہ ہے۔

مردان میں جلسے سے خطاب میں سراج الحق نے کہا کہ پی ٹی آئی اور پی ڈی ایم ایک سکے کے دو رُخ ہیں، ان حکمرانوں نے عوام کو آئی ایم ایف کی ہتھکڑیاں پہنائی۔

سراج الحق نے کہا کہ ہم ایسا نظام چاہتے ہیں جہاں عوام کی جان و مال اور عزت محفوظ ہوں، ملک میں 80 لاکھ نوجوان منشیات کی لعنت میں مبتلا ہیں، پاکستان میں غریب آدمی کی جان کی کوئی قیمت نہیں۔

انہوں نے کہا کہ غیر ملکی قرضے اشرافیہ نے کھائے اور ادائیگی عوام کر رہے ہیں۔

کچھ روز قبل فیصل آباد میں ورکرز کنونشن سے خطاب میں سراج الحق نے کہا تھا کہ شہباز شریف، عمران خان، آصف علی زرداری، اسحاق ڈار اور پرویز الٰہی کی جائیدادیں بیچ کر ملک کا قرض اتارا جائے۔

ان کا کہنا تھا کہ ان کی جگہ اقتدار نہیں بلکہ جیل میں ہے، ان سیاستدانوں کے اثاثے اربوں ڈالر کے ہیں، بلاول بھٹو نے اپنے گھر کی قیمت 50 لاکھ روپے بتائی ہے، میں اسے 2 کروڑ روپے میں خریدنے کو تیار ہوں۔

قومی ٹیم کے آل راؤنڈر شاداب خان ٹی ٹوئنٹی کرکٹ میں ایک سال کے دوران سب سے زیادہ وکٹیں لینے والے پاکستانی بولر بن گئے۔

شاداب خان نے یہ اعزاز آسٹریلیا میں جاری بگ بیش لیگ کے دوران اپنے نام کیا، جہاں قومی کرکٹر کی ٹیم ہوبارٹ ہوریکینز نے میلبرن رینی گیڈز کو 8 رنز سے شکست دی جس میں شاداب نے اہم کردار ادا کیا۔

قومی ٹیم کے لیگ اسپنر نے شاندار بولنگ کرتے ہوئے چار اوورز میں 20 رنز دے کر 3 وکٹیں حاصل کیں، انہوں نے مخالف ٹیم کے ایرون فنچ، جوناتھن ویلز اور مجیب الرحمان کو اپنا شکاربنایا۔

یہ بھی پڑھیں: بابراعظم مجھے فرسٹ کلاس کھیلنے کی اجازت دلوادیں، عمراکمل

میلبرن رینی گیڈز کے خلاف تین وکٹیں حاصل کرنے کے بعد شاداب کی رواں سال ٹی ٹوئنٹی فارمیٹ میں لی گئی وکٹوں کی تعداد 61 ہو گئی، اب تک کوئی بھی پاکستانی بولر ایک ہی سال میں ٹی ٹوئنٹی فارمیٹ میں 61 وکٹیں نہیں حاصل کرسکا ہے۔

اس سے قبل فاسٹ بولر حارث رؤف دو ہزار بائیس میں 60 وکٹیں حاصل کرچکے، قومی ٹیم کے فاسٹ بولر وہاب ریاض نے 2019 میں جب کہ آل راؤنڈر اظہر محمود نے 2013 میں 60 وکٹیں حاصل کی تھیں۔

اسلام آباد: قومی اسمبلی نے پاکستان تحریک انصاف کی جانب سے اپنے اراکین کے استعفوں کی منظوری کے لیے لکھے گئے خط کا جواب دے دیا۔

ترجمان قومی اسمبلی سیکریٹریٹ نے پی ٹی آئی کے وائس چیئرمین شاہ محمود قریشی کے خط کا جواب دیا جس میں لکھا گیا ہے کہ آپ کے اراکین کو استعفوں کی تصدیق کے لیے بلایا جائے گا۔

خط متن کے مطابق پی ٹی آئی کے ہر ارکان کو ذاتی حیثیت میں استعفے کی تصدیق کرنا ہوگی، ارکان کو اسمبلی قواعد 2007 کے ذیلی قاعد 43 کے پیراگراف بی کے تحت بلایا جائے گا۔

15 دسمبر کو شاہ محمود قریشی نے اسپیکر قومی اسمبلی راجہ پرویز اشرف کے نام لکھے گئے خط میں کہا تھا کہ 11 اپریل 2022 کو ہمارے 123 ایم این ایز نے سابق ڈپٹی اسپیکر قومی اسمبلی قاسم سوری کو تحریری استعفے دیے جو آئین اور اسمبلی قواعد کے مطابق تھے، یہ استعفے 13 اپریل 2022 کو قبول کیے گئے تھے۔

’سیکریٹری قومی اسمبلی جناب طاہر حسین نے اس دن ایک نوٹیفکیشن بھی جاری کیا لیکن موجودہ حکومت کی جانب سے سابق ڈپٹی اسپیکر کے واضح حکم پر عمل نہیں کیا گیا۔ 28 جولائی کو غیر قانونی طریقے سے صرف 11 اراکین کے استعفے منظور کیے گئے۔‘

خط میں کہا گیا کہ یہ ابھی واضح نہیں آپ کا دفتر کس قانونی بنیاد پر کچھ ممبران کو منتخب کر سکتا ہے؟ آپ نے عہدے کو موجودہ حکومت کو سیاسی فائدہ پہنچانے کے لیے استعمال کیا ہے، ضمنی انتخابات میں پی ٹی آئی کی برتری بہت واضح ہوئی جس کے تحت پارٹی نے ضمنی انتخابات کی 75 فیصد نشستیں حاصل کیں۔

شاہ محمود قریشی نے لکھا کہ ہم ایک بار پھر باضابطہ طور پر آپ سے مطالبہ کرتے ہیں کہ ہماری پارٹی کے اراکین کے باقی استعفے بغیر تاخیر قبول کیے جائیں، اسمبلی کے ممبران استعفوں کی دوبارہ تصدیق کے لیے ایوان میں آنے کے لیے تیار ہیں، ہم امید کرتے ہیں کہ آپ اس معاملے میں مزید تاخیر نہیں کریں گے۔

قومی ٹیم کے مڈل آرڈر بیٹر عمراکمل خود کے ساتھ ہونے والی ناانصافی پر کھل کر بول پڑے اور سینٹرل پنجاب کے کوچ پر سنگین الزام عائد کردیا۔

اے آر وائی نیوز کے اسپورٹس پروگرام’باؤنسر’ میں گفتگو کے آغاز پر پروگرام کے میزبان نے سوال کیا کہ آصف علی اور خوشدل شاہ کو زیادہ چانس ملے یا آپ کو؟

جس پر عمر اکمل نے کہا کہ مشکل وقت ہر کھلاڑی پر آتا ہے، میں سری لنکا کی سیریز میں مسلسل دو میچوں میں صفر پر آؤٹ ہوا، اگر ان میچوں میں اسکور کرتا تو وضاحت نہ دینا پڑتی۔

عمراکمل نے کہا کہ جہاں تک مجھے یاد پڑتا ہے کہ میں نے ٹیم میں تین بار کم بیک کیا ہے اور تینوں بار مجھے بھی نہیں پتہ کہ میں کیوں ڈراپ ہوا۔

قومی ٹیم کے مڈل آرڈر بیٹر نے شکوہ کیا کہ ٹیم سے باہر ہونے کے بعد مجھے فرسٹ کلاس کھیلنے کی بھی اجازت نہیں دی جارہی، اگر میں نے وہاں کارکردگی دکھائی تو مجھے چانس مل سکتا ہے۔

پروگرام کے میزبان نے سوال کیا کہ بابراعظم آپ کے کزن ہیں اور قومی ٹیم کے کپتان بھی ہیں، کیا آپ اپنی شکایت ان کے پاس لیکر گئے ؟

جس پر عمر اکمل نے کہا کہ میں نے اپنی سلیکشن کے معاملے پر کھبی بابراعظم سے کوئی بات ہی نہیں کی؟ اور نہ ہی اس معاملے میں کھبی رابطہ کیا۔مڈل آرڈر بیٹر کا کہنا تھا کہ بابراعظم اب پاکستان کرکٹ کا سینیئر رکن ہے، جس کی بورڈ میں بات سنی جاتی ہے، یقینا میرے ساتھ ہونے والے معاملات اس کے علم میں ہونگے۔

میزبان نے سوال کیا کہ آصف علی، خوشدل شاہ، افتخار احمد اور فخرزمان کی بھی کوئی خاص کارکردگی نہیں ہے، مگر بابراعظم پھر بھی ان کا دفاع کرتے ہیں، مگر عمراکمل کی حمایت میں کیوں نہیں آتے؟

جس پر عمراکمل نے کہا کہ میرے بابراعظم سے گزارش ہے کہ اگر میں ان کے پلان میں شامل ہوں تو وہ سیلکٹر اور سینٹرل پنجاب کے کوچ سے میری بات کرے اور مجھے فرسٹ کلاس کھیلنے کی اجازت مل جائے۔

یہ بھی پڑھیں:’اب بابر اعظم کو بہترین کپتان بنانا ہے‘

میزبان نے عمراکمل کو مخاطب کرتے ہوئے کہا کہ سابق کوچ مکی آرتھر سے آپ کو مسئلہ رہا، وقار یونس سے بھی آپ کے تعلقات سرد مہری کا شکار رہے اور اب عبدالرزاق سے بھی آپ کو شکایت ہے کیونکہ وہ سینٹرل پنجاب کے کوچ ہیں۔

جس پر عمراکمل کا کہنا تھا کہ ٹیم میں جب آپ کو عزت نہ ملے اور بغیر کسی وجہ کے آپ کو سائیڈ لائن کردیا جائے تو کھلاڑی کتنی دیر خاموش رہ سکتا ہے۔

انہوں نے برملا کہا کہ عبدالزراق نے میرے اور سینٹرل پنجاب کے دیگر کھلاڑیوں کے ساتھ ناانصافی کی ہے۔

امریکا کے دارالحکومت میں پاکستانی صحافیوں کی تنظیم واشنگٹن پریس کلب کی جانب سے معروف پاکستانی مصنف و شاعر طاہر حنفی کی نئی کتاب کی رونمائی کی تقریب کا انعقاد کیا گیا۔

اے آر وائی نیوز کے مطابق تقریب میں واشنگٹن ڈی سی، ورجینیا اور میری لینڈ میں ادب سے دلچسپی رکھنے والے افراد نے بھرپور شرکت کی۔

اس موقع پر شرکاء کا کہنا تھا کہ طاہر حنفی کی نئی کتاب موجودہ پاکستانی معاشرے کی عکاسی کرتی ہے۔

مقررین نے اس موقع پر اپنی نظمیں اور اشعار بھی پیش کیے جبکہ واشنگٹن پریس کلب کی جانب سے اس طرح کے پروگراموں کے انعقاد کو وقت کی اہم ضرورت قرار دیا۔

مزید تفصیلات ویڈیو میں: