کراچی: ملک کی نامور درس گاہ ڈاؤ یونیورسٹی نے جانور میں پھیلنے والی لمپی اسکن ڈیزیز کی فوری ویکسین بنانےکا اعلان کر دیا۔

تفصیلات کے مطابق جانوروں کو لگنے والی جلدی بیماری لمپی اسکن سے سندھ زیادہ متاثر ہے۔ 5 اضلاع کے سوا پورا صوبہ سندھ متاثر ہے اور اب تک 250گائیں ہلاک ہوچکی ہیں۔

اس تشوشیناک صورتحال میں ڈاؤ یونیورسٹی نے جانور میں پھیلنے والی لمپی اسکن ڈیزیز کی فوری ویکسین بنانےکا اعلان کیا ہے۔ محکمہ لائیوسٹاک سندھ کے اشتراک سے ویکسین بنائی جائےگی۔

صوبائی ٹاسک فورس کے مطابق بیمار جانوروں کی تعداد میں بھی مزید اضافہ ہوگیا ہے، گزشتہ ایک روز میں بیماری میں مبتلا جانوروں کے 398 نئے کیس سامنے آئے، جس سے بیمار جانوروں کی تعداد 27 ہزار 734 سے تجاوز کرگئی۔

کراچی میں سب سے زیادہ 16 ہزار 424، ٹھٹھہ میں 4 ہزار 493، حیدر آباد میں 645، سجاول میں 225، ٹنڈو محمد خان میں 808، بدین میں 887، سانگھڑ میں 717، مٹیاری میں 166، بے نظیر آباد میں 381، خیر پور میں 603، قمبر شہداد کوٹ میں 502، دادو میں 224، جامشورو میں 428، تھانہ بولا خان میں 761، چڈکیو میں 276 گائیں جلد کی بیماری سے متاثر ہو چکے ہیں۔

لمپی اسکن سے صحت یاب ہونے والے جانوروں کی تعداد بھی بڑھ کر 12 ہزار 101 ہو گئی۔

اسلام آباد: وزیر اعظم عمران خان کا کہنا ہے کہ ہم آخر تک اس مافیا کا مقابلہ کریں گے،  اپوزیشن کی تحریک عدم اعتماد کامیاب نہیں ہوگی۔

اے آر وائی نیوز کے مطابق وزیر اعظم عمران خان کی زیرِ صدارت سیاسی کمیٹی کا اجلاس ختم ہوگیا۔ اجلاس میں سیاسی صورتِ حال، اتحادی جماعتوں اور ان کے اراکین قومی اسمبلی سے رابطوں کا جائزہ لیا گیا۔

اجلاس میں وزیر اعظم عمران خان کو سپریم کورٹ آف پاکستان میں آرٹیکل 63 اے کی تشریح کے لیے صدارتی ریفرنس پر سماعت کی بریفنگ دی گئی۔

ذرائع کے مطابق حکومت نے قومی اسمبلی اجلاس کے حوالے سے حکمت عملی تیار کرلی۔ وزیر اعظم سے قانونی ٹیم کی بھی ملاقات ہوئی۔

اجلاس میں اظہارِ خیال کرتے ہوئے وزیر اعظم عمران خان نے کہا کہ یہ اپوزیشن کی غلط فہمی ہے کہ میں ان کے دباؤ میں آ جاؤں گا، 27 مارچ کو عوام بتا دیں گے کہ وہ کس کے ساتھ ہیں۔

خیال رہے کہ وزیر اعظم عمران خان کی زیرِ صدارت گزشتہ روز سیاسی کمیٹی کے ہونے والے اجلاس میں اتحادی جماعتوں سے رابطے جاری رکھنے کا فیصلہ کیا گیا تھا۔

اس کے علاوہ گزشتہ روز حکومتی ٹیم نے ایم کیو ایم پاکستان کے وفد سے اہم ملاقات کی تھی۔ اسپیکر قومی اسمبلی اسد قیصر، وزیر دفاع پرویز خٹک اور وزیر منصوبہ بندی اسد عمر پر مشتمل وفد پارلیمنٹ لاجز پہنچا اور ایم کیو ایم ارکان کو وزیر اعظم عمران کا پیغام پہنچایا تھا۔

ملاقات میں مثبت پیشرفت ہوئی اور دونوں اطراف سے ملاقاتیں جاری رکھنے پر اتفاق ہوگیا۔

سربراہ پاک فضائیہ ایئر چیف مارشل ظہیر احمد بابر سدھو نے آج سربراہ ترکش جنرل اسٹاف اور ایئر آفیسر کمانڈنگ 22 گروپ رائل ایئر فورس سے الگ الگ ملاقاتیں کیں- ان ملاقاتوں کے دوران پیشہ ورانہ اور باہمی دلچسپی کے امور پر تبادلہ خیال کیا۔

ترکش جنرل اسٹاف جنرل یاسر گلر نے پیشہ ورانہ مہارت اور ایوی ایشن انڈسٹری میں خود انحصاری کی طرف گامزن پاک فضائیہ کی تعریف کی۔ ایئر چیف نے کہا کہ پاکستان اور ترکی کے مابین دیرینہ مذہبی، ثقافتی اور تاریخی رشتہ قائم ہے جو دونوں فضائی افواج کے مابین مضبوط روابط کا مظہر ہے۔ ایئر چیف نے دونوں برادر ممالک کے درمیان باہمی تعاون کو مزید فروغ دینے کے عزم کا اعادہ بھی کیا۔

سربراہ پاک فضائیہ نے ایئر آفیسر کمانڈنگ 22 گروپ رائل ایئر فورس، ایئر وائس مارشل رچرڈ میڈیسن کے ساتھ ایک علیحدہ ملاقات میں کہا کہ پاکستان برطانیہ کے ساتھ اپنے مضبوط سفارتی، اقتصادی اور دفاعی تعلقات کو قدر کی نگاہ سے دیکھتا ہے۔

معزز مہمان نے علاقائی استحکام میں پاکستان کے کردار کو سراہا۔ انہوں نے پاک فضائیہ کی پیشہ وارانہ مہارت کی بھی تعریف کی۔ انہوں نے پاکستان کے ساتھ ہر سطح پر سفارتی اور فوجی تعاون میں مزید بہتری کے لیے اپنا کردار ادا کرنے کی یقین دہانی کروائی۔ ملاقات میں دونوں ممالک کے درمیان پیشہ ورانہ تعاون کو مزید فروغ دینے کے اقدامات پر بھی تبادلہ خیال کیا گیا۔