اسلام آباد: کل کے سیاسی حلیف آج کے حریف بن گئے۔ پاکستان پیپلز پارٹی اور مسلم لیگ (ن) سابق دورِ حکومت کی ناکامیوں کا ملبہ ایک دوسرے پر ڈالنے لگیں۔
اے آر وائی نیوز کے مطابق ذرائع نے بتایا پیپلز پارٹی (ن) لیگی رہنماؤں کے مخالف بیانات پر شدید برہم ہوگئی اور اس متعلق اپنی قیادت کو تحفظات سے آگاہ کر دیا۔
ذرائع کے مطابق پی پی قیادت پر (ن) لیگی قیادت کو تحفظات سے آگاہ کرنے کیلیے دباؤ بڑھنے لگا ہے۔ پارٹی رہنماوں کو تاحال پارٹی قیادت کی جانب سے جواب موصول نہیں ہوا۔ پیپلز پارٹی رہنماؤں نے معاملہ سی ای سی اجلاس میں لے جانے کا فیصلہ کیا ہے۔
ذرائع کے مطابق پی پی رہنما کا کہنا ہے کہ (ن) لیگی رہنماؤں کی بیان بازی کا معاملہ قیادت کے سامنے رکھیں گے اور لیگی قیادت سے وضاحت طلبی کا مطالبہ کریں گے، (ن) لیگی رہنماؤں کے مخالف بیانات سنجیدہ معاملہ ہے۔
رہنما نے کہا کہ لیگی رہنماؤں کے بیانات کسی صورت نظر انداز نہیں کر سکتے، لیگی رہنما پیپلز پارٹی مخالف بیانات انفرادی حیثیت میں نہیں دے رہے، شک ہے کہ وہ پارٹی پالیسی کے تحت ہم پر تنقید کر رہے ہیں، وہ ڈیڑھ سالہ ناکامیوں کا ملبہ ہم پر مت ڈالیں۔
پی پی رہنما نے کہا کہ پیپلز پارٹی دیگر جماعتوں کی طرح حکومتی اتحاد کا حصہ تھی، لیگی رہنما دیگر جماعتوں کو چھوڑ کر پیپلز پارٹی کو تنقید کا نشانہ بنا رہے ہیں، (ن) لیگی قیادت کے پارٹی رہنماؤں کے بیانات پر خاموشی سوالیہ نشان ہے۔
انہوں نے کہا کہ لیگی قیادت کا پی پی مخالف بیان بازی کا نوٹس نہ لینا افسوسناک ہے، سابقہ حکومت کی کامیابیوں اور ناکامیوں کی ذمہ دار تمام اتحادی جماعتیں ہیں۔
