ساف چیمپئن شپ میں بھارتی کھلاڑیوں نے فٹبال کے میدان کو پھر ریسلنگ کا اکھاڑہ بنا ڈالا اور پاکستان کے بعد نیپال کے کھلاڑیوں سے بھی جھگڑ پڑے۔
ساف چیمپئن شپ بھارتی شہر بنگلور میں جاری ہے لیکن وہ اپنے کھیل سے زیادہ بھارتی کھلاڑیوں کے جارحانہ لڑاکا انداز کی وجہ سے دنیا میں شہرت حاصل کر رہی ہے۔
چند دن قبل پاک بھارت میچ میں بھارتی کھلاڑی اور کوچ پاکستانی کھلاڑیوں سے الجھ پڑے اب ایک بار پھر انہوں نے فٹبال کے میدان کو ریسلنگ کے اکھاڑے میں بدل دیا۔
تاہم اس بار بھارتیوں کا مدمقابل نیپال تھا۔ میچ جاری تھا کہ بھارتی کھلاڑی آپے سے باہر ہوگئے۔ اس موقع پر دونوں ٹیموں کے کھلاڑی آپس میں الجھ پڑے، ایک دوسرے کو دھکے دیے اور مارنے کے لیے چڑھ دوڑے۔
Another fight, and now it's between India and Nepal🤣🤣#INDNEP #SAFFChampionship pic.twitter.com/ieGbQ1aV3F
— BumbleBee 軸 (@itsMK_02) June 24, 2023
اس موقع پر ریفری کو مداخلت کرنا پڑی اور دونوں ٹیموں کے کھلاڑیوں کو خاموش کروایا گیا بعدازاں کچھ دیر بعد صورتحال پر قابو پا کر میچ دوبارہ شروع کردیا گیا۔
بھارت نے میچ میں نیپال کو دو صفر سے شکست دیکر ساف فٹبال چیمپئین شپ کے سیمی فائنل میں جگہ پکی کرلی ہے۔
