اسلام آباد : قومی ایئرلاین پی آئی اے کے پائلٹس نے تنخواہوں پر35 سے 40 فیصد تک ٹیکس عائد ہونے کے بعد استعفے دے دیئے۔
تفصیلات کے مطابق قومی ایئرلائن کے پائلٹس نے تنخواہوں پر پینتیس سے چالیس فیصد تک ٹیکس کے خلاف مستعفی ہونا شروع کردیا۔
قومی اسمبلی کی قائمہ کمیٹی برائے ایوی ایشن کے اجلاس میں انکشاف ہوا ہے کہ پی آئی اے نے پائلٹس کی تنخواہوں پر پینتیس سے چالیس فیصد ٹیکس عائد کر دیا ہے۔
جس کے بعد آٹھ لاکھ تنخواہ لینے والے پائلٹ کو ساڑھے تین لاکھ روپے اضافی ٹیکس ادا کرنا پڑ رہا ہے، جس کے باعث دو درجن سے زائد پائلٹس نے استعفے دے رکھے ہیں، جنھیں منظور نہیں کیا جا رہا۔
رکن کمیٹی سائرہ بانو نے انکشاف کیا پی آئی اے حکام کی جانب سے استعفوں کی تصدیق کرتے ہوئے کہا ہے کہ پائلٹس کے استعفے موصول ہوئے ہیں۔
پی آئی اے نے 250 نئے پائلٹ بھرتی کرنے کے لیے حکومت کو لکھا ہے تاہم حکومت نے پائلٹس کی نئی بھرتیوں پر تاحال جواب نہیں دیا۔
چیف کمرشل آفیسر کا کہنا ہے کہ سپریم کورٹ نے پی آئی اے میں نئی بھرتیوں پر پابندی عائد کر رکھی ہے۔
