ایشیا کپ کے بعد ورلڈ کپ میں بھی مسلسل ناکامی اور تنقید کے بعد پاکستان ٹیم کے نائب کپتان شاداب خان کو میگا ایونٹ میں آسٹریلیا کے خلاف میچ میں ڈراپ کر دیا گیا۔
پاکستان کرکٹ ٹیم آج بنگلورو میں آسٹریلیا کے خلاف ورلڈ کپ کا میچ نائب کپتان شاداب خان کے بغیر کھیل رہی ہے کیونکہ ٹیم منیجمنٹ نے ان کے ایشیا کپ کے بعد ورلڈ کپ میں بھی مسلسل ناکام رہنے کے بعد انہیں بالآخر آرام دینے کا فیصلہ کرتے ہوئے انکی جگہ اسامہ میر کو ٹیم میں شامل کیا ہے۔
شاداب خان جنہوں نے ماضی میں پاکستان کی فتوحات میں میں اہم کردار ادا کیا ہے اور کئی میچز جتوائے ہیں تاہم حالیہ کچھ عرصے سے وہ ٹیم میں آل راؤنڈر کا اپنا کردار ادا نہیں کر پا رہے۔ ان کے بیٹ ہی رنز اگل رہے ہیں نہ ہی ان کی بالنگ مخالف بلے بازوں کو پویلین بھیج رہی ہے۔
ورلڈ کپ کے ابتدائی تین میچوں کی دو اننگ میں انہوں نے صرف 34 رنز بنائے جن میں سے 32 رنز کمزور ترین ٹیم نیدر لینڈ کے خلاف جب کہ روایتی حریف بھارت کے خلاف صرف دو رنز ہی بنا سکے۔
بات کی جائے ان کی بالنگ کی تو میگا ایونٹ کے ابتدائی تین میچز میں انہوں نے صرف 2 وکٹیں حاصل کیں اس کے لیے 131 رنز مخالف بلے بازوں کو دیے۔ سری لنکا اور نیدر لینڈ کے خلاف ایک ایک وکٹ لی جب کہ بھارت کو 31 رنز دینے کے باوجود کوئی وکٹ نہ لے سکے۔
اس سے قبل سری لنکا اور پاکستان میں کھیلے جانے والے ایشیا کپ کی بات کی جائے تو اس کے بھی چار میچز میں شاداب خان نے صرف 5 وکٹیں ہی حاصل کر پائے تھے جس میں چار وکٹیں تو نیپال جیسی ٹیم کیخلاف تھیں جب کہ یہاں بھی ان کا بلا مکمل خاموش رہا تھا۔
مسلسل ناقص پرفارمنس پر تجزیہ کاروں، ناقدین اور شائقین کی توپوں کا رخ شاداب کان کی طرف تھا اور ان کی جانب سے قومی کپتان اور منیجمنٹ پر شاداب خان کو ڈراپ کرکے اسامہ میر کو موقع دینے کا مطالبہ کیا جا رہا تھا۔