لندن : برطانیہ میں اشیائے خورونوش کی قیمتوں میں اضافے کے سبب مہنگائی سال کی بلند ترین سطح پر پہنچ گئی۔
برٹش ریٹیل کنسورشیم (بی سی آر) کی رپورٹ کے مطابق برطانیہ میں اشیائے خورد ونوش کی قیمتوں میں گزشتہ 12 مہینوں کے دوران 15.7 فیصد کا ریکارڈ اضافہ ہوا ہے جو کہ 2005کے بعد سے سب سے بڑا اضافہ ہے۔
برٹش ریٹیل کنسورشیم (بی سی آر) کا کہنا ہے کہ اس سے قبل سال 1977 میں منہگائی کی شرح 19.1ریکارڈ کی گئی تھی، گزشتہ اکتوبر میں برطانیہ میں مہنگائی کی شرح 11.1 فیصد تک پہنچ گئی تھی، جو 40 سال سے زائد عرصے میں سب سے زیادہ ہے۔
بی آر سی کے مطابق کافی کی پھلیاں اور تیار کھانوں کی پیکنگ اور پیداوار نے اشیائے خورد و نوش کی قیمتوں کو بڑھایا ہے لیکن مکھن اور سبزیوں کے تیل کی قیمتیں کچھ کم ہونے کے امکانات ہیں جس سے صارفین کو کچھ ریلیف ملنے کی امید ہے۔
برطانیہ کے دفتر برائے قومی شماریات کے مطابق تقریباً نصف برطانوی شہریوں کا کہنا ہے کہ وہ معمول سے کم خریداری کررہے ہیں اور اشیائے خوردو نوش کی قیمتیں بجلی اور دیگر کے بلوں کے ساتھ منسلک ہیں جو ہمارے لیے تشویش کا باعث ہے۔
