اسلام آباد: وفاقی وزیر خارجہ بلاول بھٹو زرداری نے کہا ہے کہ کشمیری عوام کی پاکستان سے قلبی وابستگی دنیا کے آگےکھلا راز ہے۔
تفصیلات کے مطابق وزیر خارجہ بلاول بھٹو زرداری نے یوم استحصال کشمیر کے موقع پر جاری پیغام میں کہا کہ مودی حکومت کا یکطرفہ اقدام مقبوضہ کشمیر کیخلاف آخری ہتھکنڈہ تھا۔
بلاول بھٹو ذرداری نے کہا کہ مودی حکومت کا کشمیر کے خلاف مذکورہ آخری ہتھکنڈہ بھی ناکام ثابت ہوا، مقبوضہ کشمیر کی حیثیت تبدیل کرنے سے بھارت دنیا میں بے نقاب ہوا، آج دنیا کے ہر کونے میں لوگ بھارتی مظالم کے خلاف احتجاج کر رہے ہیں۔
وزیر خارجہ نے کہا کہ بھارت مقبوضہ کشمیر کو زیادہ عرصے تک جبر کی زنجیروں میں جکڑ کر رکھ نہیں سکتا، بھارت کشمیری عوام کی جدوجہد آزادی کو دبانے میں ناکام رہا۔
پاکستان سمیت دنیا بھر میں آج یوم استحصال کشمیر منایا جا رہا ہے
وزیرخارجہ بلاول بھٹو نے کہا کہ کشمیری عوام کی پاکستان سے قلبی وابستگی دنیا کے آگے کھلا راز ہے، پاکستان مقبوضہ کشمیر میں بھارتی مظالم کو دنیا کے ہر فورم پر اٹھاتا رہے گا۔
انہوں نے مزید کہا کہ قائد عوام اور شہید بینظیر بھٹو آزادی کشمیر کے سب سے بڑے حامی تھے، پاکستان پیپلز پارٹی کشمیریوں کے ساتھ مکمل یکجہتی کا اظہار کرتی ہے۔
