آسٹریلوی اوپنر بیٹر ڈیوڈ وارنر نے سابق فاسٹ بولر مچل جانسن کی تنقید پر خاموشی توڑ دی۔
آسٹریلوی میڈیا رپورٹس کے مطابق ایک کالم میں مچل جانسن نے لکھا تھا کہ آسٹریلوی کرکٹ کی تاریخ کے سب سے بڑے اسکینڈل میں پھنسنے والے اور مشکلات کا شکار اوپنر ڈیوڈ وارنر کو کیوں ان کی خواہش کے مطابق فیئر ویل دیا جارہا ہے۔
مچل جانسن کو اس بیان کے بعد تنقید کا سامنا کرنا پڑا اور انہیں آسٹریلیا اور پاکستان کے درمیان سیریز کے لیے ٹرپل ایم کے کمنٹری پینل سے بھی نکال دیا گیا۔
تاہم مچل جانسن کی تنقید کا جواب دیتے ہوئے اوپنر ڈیوڈ وارنر نے کہا کہ سابق کھلاڑیی اپنی رائے کا حق رکھتے ہیں، ہر کسی کو اپنی رائے کا حق ہے ہمیں اب آگے بڑھنا ہے، یہ سیزن ہیڈ لائن کے بغیر نہیں ہوگا، ہم پرتھ میں سیزن کے پہلے ٹیسٹ میچ کے منتظر ہیں۔
دوسری جانب کپتان پیٹ کمنز نے بھی کہا تھا کہ میرے خیال میں ہم ایک دوسرے کو بہت خیال رکھتے ہیں، ہم سالہا سال سے اکٹھے کھیل رہے ہیں، ڈیوڈ وارنر اور اسمتھ کے ساتھ کھیلتے ہوئے 12 سال ہوگئے ہیں۔
پیٹ کمنز نے کہا تھا کہ ہم کامیاب سیزن کے لیے پرامید ہیں اور ہمارے پاس بہت مثبت چیزیں ہیں جن پر ہم فوکس کرسکتے ہیں۔
واضح رہے کہ پاکستان اور آسٹریلیا کے درمیان تین ٹیسٹ میچوں کی سیریز کا پہلا میچ 14 دسمبر سے پرتھ میں کھیلا جائے گا۔
