آسٹریلیا کے خلاف کل سے سڈنی میں شروع ہونے والے تیسرے ٹیسٹ کے لیے پاکستان کی 11 رکنی ٹیم کا اعلان کر دیا گیا ہے۔
مسلسل خراب فارم کے باعث اوپنر امام الحق کو ڈراپ کر دیا گیا ہے جب کہ نوجوان صائم ایوب کل ڈیبیو کریں گے۔
قومی ٹیم پچھلے تین سال میں سب سے زیادہ ٹیسٹ کیپ بانٹنےوالی ٹیم بن گئی ہے۔ صائم ایوب دوہزار اکیس سے اب تک ڈیبیو کرنے والے سولہویں پاکستانی بن جائیں گے۔
ان تین سالوں میں زاہد محمود، ظفر گوہر تابش خان اور محمدعلی ایسے کھلاڑی ہیں جو آتے ہی غائب ہو گئے جب کہ حارث رؤف نے ایک، وسیم جونیئر نے دو ٹیسٹ کھیلے ہیں۔
خرم شہزاد پہلے میچ کے بعد ان فٹ اور عمران بٹ چھ ٹیسٹ بعد ڈراپ ہوئے۔ ساجدخان سات ٹیسٹ کھیل کر باہر ہوئے اور اب ایک سال سات ماہ بعدٹیم میں واپسی ہوئی ہے۔
عبداللہ شفیق، سعودشکیل، آغاسلمان، ابرار احمد اور نعمان علی ایسے نئے کھلاڑی ہیں جومستقل بنیادوں پر ٹیسٹ ٹیم میں جگہ بنانے میں کامیاب ہو گئے۔
قابل ذکر بات یہ ہے کہ چہرے بدلتے جا رہے ہیں مگر بڑی ٹیموں کیخلاف نتائج جوں کےتوں ہیں۔
