اسلام آباد : نو منتخب چیئرمین جوائنٹ چیفس آف اسٹاف کمیٹی جنرل زبیر حیات اور نئے آرمی چیف قمر جاوید باجوہ وزیراعظم ہائوس پہنچ گئے اور علیحدہ علیحدہ وزیراعظم سے ملاقاتیں کیں جس میں دونوں افسران کو وزیراعظم نے مبارک بادیں پیش کیں۔

اے آر وائی کے نمائندہ اسلام آباد لئیق الرحمان نے بتایا کہ تفصیلی ملاقات میں جہاں وزیراعظم نے دونوں کو مبارک بادیں پیش کیں وہیں انہوں نے توقع ظاہر کی ہےکہ جس انداز میں موجودہ عسکری قیادت نے دہشت گردی کے خلاف اقدامات کیے اور ملک دشمن عناصر کا قلع قمع کرنے کے لیے کردار ادا کیا امید ہے نئی قیادت بھی اسی طرح اپنا کردار ادا کرے گی اور دشمن عناصر کا مکمل خاتمہ کرے گی۔

ملاقات میں قمر جاوید باجوہ نے کہا کہ پاکستان کا دفاع ناقابل تسخیر ہے جب کہ جنرل زبیر حیات نے کہا کہ پاک فوج وطن کے دفاع کے لیے کسی قربانی سے دریغ نہیں کرے گی۔

نئے چیئرمین جوائنٹ چیفس آف اسٹاف جنرل زبیر محمود حیات اور نئے آرمی چیف نے جنرل قمر جاوید باجوہ نے وزیراعظم پاکستان سے اپنی ملاقات میں اُن کا شکریہ ادا کرتے ہوئے یقین دہانی کرائی کہ مادرِ وطن کا دفاع یقینی بناتے ہوئے ہرممکن اقدامات کیے جائیں گے۔

اس سے قبل ترجمان وزیراعظم ہاو س مصدق ملک نے تصدیق کی کہ صدر مملکت نے وزیراعظم کی مشاورت پر نئے آرمی چیف جنرل قمر جاوید باجوہ اور نئے چیئرمین جوائنٹ چیفس آف اسٹاف جنرل زبیر حیات کی تعیناتی کی ہے جو 29 نومبر کو اپنے عہدے سنبھال لیں گے۔

اسلام آباد : چیئرمین تحریک انصاف عمران خان نے کہا ہے کہ پاکستان میں نئی تاریخ بننے جارہی ہے پاناما لیکس پرعدالتی فیصلہ تاریخ ساز فیصلہ ہوگا۔

بنی گالہ میں صحافیوں سے ملاقات کے دوران ان کا کہنا تھا کہ پاناما پیپرز کا انکشاف نہ ہوتا تو وزیراعظم کے اہلِ خانہ کبھی نہیں مانتے کہ مے فیئر میں ہمارے فلیٹس اور دیگر جائیداد ہیں۔

انہوں نے کہا کہ پاکستان میں نئی سیاسی تاریخ رقم ہونے جا رہی ہے پہلی مرتبہ وزیراعظم کی تلاشی لی جا رہی ہے حکومت کے ذہن میں بھی نہیں تھا کہ معاملہ سپریم کورٹ پہنچ جائے گا، پاناما کیس پرعدالتی فیصلہ تسلیم کریں گے تاہم سیاسی طورپر تحریک انصاف یہ کیس پہلے ہی جیت چکے ہے۔

عمران خان کا کہنا تھا کہ ثبوت دینا ہمارا کام نہیں ہے،تحقیقات کرنا کمیشن کاکام ہے تاہم اب ہمارے پاس مضبوط ثبوت اور بہترین قانونی دلائل آ گئے ہیں برطانیہ سے کچھ اہم چیزیں ملی ہیں جس سے کیس مزید مضبوط ہو جائے گا۔

انہوں نے کہا کہ پاناما کیس شریف فیملی کی ذاتی کرپشن کا کیس ہے نواز شریف کی وجہ سے باقی لوگ بچ رہے ہیں ہم نے عدالت میں صرف یہ ثابت کرنا ہے نواز شریف جھو ٹ بول رہے ہیں۔

عمران خان کا کہنا تھا کہ تحقیقاتی ادارے آزاد ہیں ادارے تباہ ہوں توملک تباہ ہوجاتا ہے جب کہ جمہوریت تباہ ہوتوملک کامستقبل تباہ ہوجاتا ہے۔

انہوں نے کہا کہ میرے پاناما لیکس میں میرا نام ہی نہیں تھا لیکن ہمیں خاموش کروانے کے لیے ایف بی آر اور الیکشن کمیشن کو میرے پیچھے لگا دیا گیا۔