لاہور : پنجاب پولیس نے مختلف جرائم میں ملوث بیرون ملک فرار ہونے والے ملزمان کی گرفتاری کیلئے اقدامات تیز کردیئے، اشتہاریوں کے خلاف کریک ڈاؤن کرتے ہوئے بیرون ملک سے مزید10اشتہاری ملزمان کو گرفتار کرلیا گیا۔
اس حوالے سے پنجاب پولیس کے ترجمان کا کہنا ہے کہ گرفتار اشتہاریوں کو سعودی عرب، یو اے ای، مسقط اور یونان سے واپس پاکستان لایا جارہا ہے۔ رواں سال قتل، اقدام قتل اور اغواء برائے تاوان میں ملوث 28اشتہاری ملزمان کو بیرون ملک سے گرفتار کیا گیا۔
ترجمان پنجاب پولیس کے مطابق نارروال پولیس کو مطلوب 3اشتہاریوں عاکف حمید کو دبئی، ظہیر کو مسقط ، یاسر کو یونان سے گرفتار کیا گیا جبکہ ڈی جی خان پولیس کو مطلوب 3اشتہاریوں غلام فرید، محمد اصغر کو یواے ای، ظفر اقبال کو سعودی عرب سے گرفتار کیا گیا۔
اس کے علاوہ ملتان پولیس کو مطلوب 2 اشتہاریوں محمد مجاہد کو سعودی عرب، محمد وسیم کو یو اے ای سے، سیالکوٹ پولیس کو مطلوب اشتہاری طیب علی اور اٹک پولیس کا اشتہاری ملزم عبادت یو اے ای سے گرفتار کیا گیا۔
آئی جی پنجاب ڈاکٹرعثمان انور نے ہدایات جاری کی ہیں کہ انٹرپول اور ایف آئی اے کے تعاون سے مفرور اشتہاریوں کی گرفتاریوں کو مزید تیز کیا جائے، اشتہاریوں کے پاسپورٹس منسوخی کے ساتھ انٹرپول کے ریڈ نوٹس جاری کروائے جائیں۔
