لاہور: پی ٹی آئی چیئرمین عمران خان نے نیب کے 19 مئی کے نوٹس کا تحریری جواب جمع کروا دیا۔

اے آر وائی نیوز کے مطابق چیئرمین پی ٹی آئی عمران خان نے نیب کے نوٹس کے جواب میں کہا ہے کہ نیب نوٹس سے واضح ہے کہ الزامات وفاقی کابینہ کی جانب سے رازدارانہ معاہدے کی منظوری ہے، 190 ملین پاؤنڈ کی رقم سپریم کورٹ کے اکاؤنٹ میں موجود ہے، رقم سے قسم کا کوئی ذاتی فائدہ نہیں اٹھایا۔

جواب میں کہا گیا ہے کہ ذاتی طور پر این سی اے سے طے معاہدے کا حصہ نہیں تھا لہٰذا کوئی معلومات نہیں، نیب کی جانب سے کرپشن کے الزامات من گھڑت، بے بنیاد اور بدنیتی پر مبنی ہیں۔

عمران خان نے جواب میں کہا کہ نیب کی جانب سے ضروری دستاویز فراہم نہ کرنے کا الزام بھی غلط ہے، نیب کال اپ نوٹس کے جواب میں میری دسترس میں موجود دستاویز جمع کرائی جاچکی ہیں۔

جواب میں کہا گیا ہے کہ میں یا میری اہلیہ نے ٹرسٹی کے طور پر کسی اراضی یا دیگر ذرائع سے مالی فائدہ نہیں اٹھایا، کابینہ نے رازدارانہ معاہدے کی منظوری متفقہ طور پر قانون کے مطابق دی تھی۔

عمران خان نے جواب میں موقف اختیار کیا کہ نیب میں پیشی سے قبل گزشتہ جواب میں اعتراضات سے آگاہ کرچکا ہوں۔

انہوں نے کہا کہ نیب انکوائری رپورٹ نو مئی کو غیرقانونی گرفتاری کے بعد موصول ہوئی جو پولیس لائنز میں رہ گئی، درخواست ہے انکوائری رپورٹ کی ایک کاپی زمان پارک رہائشگاہ پہنچائی جائے۔

اسلام آباد: وفاقی وزیر اطلاعات و نشریات مریم اورنگزیب نے سابق وزیر اعظم اور چیئرمین پاکستان تحریک انصاف عمران خان سخت تنقید کے تیر چلا دیے۔

سماجی رابطے کی ویب سائٹ ٹوئٹر پر وفاقی وزیر مریم اورنگزیب نے اپنی سلسلہ وار ٹوئٹس میں عمران خان کو مخاطب کرتے ہوئے لکھا کہ ناحق سزا پانے والوں اور چوروں میں موازنے کا آئینہ پیش ہے، تم نے ہر جھوٹا مقدمہ بنایا لیکن نواز شریف سمیت ہم ڈٹ کر کھڑے رہے، عوام اور قیادت کو پتا تھا ایک دھیلے کی کرپشن نہیں کی اور امانت سمجھ کرعوامی خدمت کی۔

مریم اورنگریب نے کہا کہ نواز شریف سمیت ہم اسی لیے بہادری سے ڈٹ کر کھڑے رہے، یہ تصاویر جرآت بہادری اور فاداری کی ناقابل فراموش مثالیں ہیں، تمہاری فسطائیت، بدترین سیاسی انتقام اور ظلم و جبر کے منہ بولتے حقائق ہیں، چار نسلوں کا حساب دیا اور سرخرو ہوئے۔

’ہماری بہو بیٹیاں بہنیں تمہارے کم ظرف و حشیانہ انتقام کا نشانہ بنیں۔ تم نے مریم نواز کو نواز شریف کی کمزوری سمجھ کر باپ کے سامنے گرفتار کیا۔ مریم نواز کو سزائے موت کی چکی میں ڈالا۔ چیئرمین نیب کو بلیک میل کر کے جھوٹے مقدمات بنائے اور جیلوں میں ڈالا۔ تم اور تمہارے مسلح جتھوں نے قومی و حساس عمارتوں پر حملے کیے۔‘

انہوں نے کہا کہ تم اور تمہارے مسلح جتھوں نے شہدا کی یادگاروں کی بے حرمتی کی، ریڈیو پاکستان، مساجد، اسکول، اسپتال اور ایمبولنسز جلانے کے جرم پر مقدمے بنے، تم اور تمہاری کابینہ گرفتاری پر روتی، بھاگتی اور گیدڑوں کی طرح چھپتی پھرتی ہے۔

مریم اورنگزیب نے کہا کہ تمہاری کابینہ چھوڑتی جا رہی ہے کیونکہ انہیں معلوم ہے تم چور اور فارن ایجنٹ ہو، تمہاری کابینہ کو معلوم ہے کہ تم القادر ٹرسٹ کے 60 ارب کے ڈاکو ہو، تم اور تمہارے جتھوں نے وطن پر لشکر کشی کی اور کرائی، ہم سے اپنا موازنہ نہ کرو۔

’75 سالہ تاریخ میں سیاسی قائدین نے سیاسی مخالفت کی ہے۔ تم پہلے آر ٹی ایس ساختہ شخص ہو جس نے ملک کے ساتھ دشمنی کی۔ سب سے بڑھ کر ناقابل معافی جرم یہ ہے کہ تم نے ریاست سے دشمنی کی۔ ہم نے بہادری سے جبر کا سامنا کیا اور ملک، جمہوریت کی حفاظت کی اور کرتے رہیں گے۔‘

اسلام آباد: پیپلزپارٹی رہنما شیری رحمان کا کہنا ہے کہ تحریک انصاف تو تحریک انتشار بن کر رہ گئی ہے۔

اے آر وائی نیوز کے مطابق پیپلزپاٹی رہنما شیری رحمان نے میڈیا سے گفتگو کرتے ہوئے کہا کہ مجھے کوئی حیرت نہیں ہے کہ سیاست دان پی ٹی آئی کو چھوڑ رہے ہیں، 9 مئی کو جو کچھ ہوا اس کو کوئی ریاست برداشت نہیں کرے گی جو کچھ کیا گیا وہ تابوت میں کیل ٹھوکنے کے برابر ہے۔

انہوں نے کہا کہ یہ صبح کہتے ہیں انتشار کرو شام کو کہتے ہیں مجھے پتا نہیں تھا، یہ سیاست نہیں بلکہ انا پسندی اور فسطائیت کے زمرے میں آتا ہے۔

شیری رحمان نے کہا کہ کسی کے برے وقت میں ڈھول بجانے کے قابل نہیں ہوں لیکن پی ٹی آئی کے بہت سے رہنما اسی طرح اپنی غلطی کا ازالہ کررہے ہیں۔

انہوں نے کہا کہ جس طرح لوگ علیحدگی کا اعلان کررہے ہیں پی ٹی آئی کا نظریہ بے نقاب ہورہا ہے۔

پی پی رہنما نے کہا کہ 9 مئی کو جو ہوا پاکستان کی تاریخ میں ایسا دن نہیں دیکھا، شہدا کی یادگاروں کو بھی نہیں چھوڑا، واقعے کی جتنی مذمت کی جائے کم ہے۔