پشاور : سی ٹی ڈی تھانہ کبل میں دھماکے کا مقدمہ درج کرلیا گیا ، مقدمے میں قتل،اقدام قتل اور دہشت گردی کی دفعات شامل کی گئی ہیں۔

تفصیلات کے مطابق پولیس نے سوات کے ضلع کبل میں تھانہ سی ٹی ڈی میں دھماکے کامقدمہ درج کرلیا ، مقدمے میں قتل، اقدام قتل اور دہشت گردی دفعات شامل کی گئیں ہیں۔

مقدمہ سی ٹی ڈی تھانے کے ایس ایچ او اکرام خان کی مدعیت میں درج کیا گیا، ایف آئی آر میں302 ،324 ،353 ،427 کی دفعات شامل کی گئیں ، ایف آئی آرملاکنڈ ریجن میں درج کی گئی ہے۔

یاد رہے سوات کے تھانہ سی ٹی ڈی کبل میں یکے بعد دیگرے دو دھماکوں کے نتیجے میں ایک درجن سے زائد افراد لقمہ اجل بنے اور ستر زخمی ہوئے۔ ابتدائی تحقیقات میں پولیس کو دہشت گردی کے شواہد نہیں ملے پولیس ، حکام کا کہنا تھا دھماکا سی ٹی ڈی کی پرانی عمارت میں ہوا، جہاں اسلحہ اور مارٹر گولے رکھے تھے۔

بعد ازاں کبل میں سی ٹی ڈی تھانے میں ہونے والے دھماکے کی ابتدائی تحقیقاتی رپورٹ سامنے آئی تھی ، جس کے تحت سانحہ مال خانے میں رکھا بارودی مواد پھٹنے سے ہوا۔

خیال رہے سی ٹی ڈی کبل میں تباہ شدہ عمارت میں ناکارہ بارود تلف کرنے کے لئے پاک فوج کے تکنیکی ماہرین اپنی جان کی پرواہ کئے بغیر مسلسل مصروف ہیں، متاثرہ عمارت کے گراونڈ اور فرسٹ فلور کو کلیئر کر دیا گیا ہے جبکہ بیسمنٹ کلیئرنس کے مراحل میں داخل ہوگئی ہے۔

پاک فوج کی امدادی، ریسکیو اور انجینئرز کے ماہرین پر مشتمل ٹیمیں کٹھن اور پُر خطر صورتحال میں اپنی ہر ممکنہ کوششوں سے عمارت کو کسی بھی مزید خطرے سے بچانے کیلئے کوشاں ہیں اور یہ سلسلہ مکمل کلئیرنس تک جاری رہے گا۔

کراچی : سندھ کے عازمین حج کا تربیتی پروگرام جمعرات 27 اپریل سے شروع ہوگا، یہ پروگرام 21 روز تک جاری رہے گا۔

تفصیلات کے مطابق حج ڈاریکٹوریٹ نے سندھ سے تعلق رکھنے عازمین حج کو مناسک حج کی تربیت کا شیڈول جاری کردیا، سندھ کے عازمین حج کا تربیتی پروگرام جمعرات 27 اپریل سے شروع ہوگا۔

حکام نے بتایا کہ عازمین حج کے سندھ بھر میں تربیتی پروگرام 21 روز تک جاری رہے گا، عازمین حج کی تربیت کا آغاز 27 اپریل کو جامع مسجد صدر حیدرآباد سے ہوگا۔

حج ڈاریکٹوریٹ کا کہنا تھا کہ 8 اپریل کو حجاج کا تربیت جامشورو میں ڈسٹرکٹ کونسل ہال میں ہوگی جبکہ 30 اپریل کو ٹنڈوالہیار سے تعلق رکھنے والے حجاج کو تربیت ایلیمنٹری اسکول میں ہوگا۔

حکام کے مطابق یکم مئی کو مٹیاری، 2 مئی کو ٹنڈو آدم، 3 مئی کو نوابشاہ ، 4 مئی سانگھڑ 5 مئی میرپورخاص 6 مئی عمرکوٹ 7 مئی کو ٹنڈو محمد خان اور بدین میں حجاج کی تربیت ہوگی۔

کراچی میں عازمین حج کی تربیت 4 مئی تا 15 مئی تک شہر میں قائم مختلف سینٹرز میں ہوگی، رواں سال کے حجاج کو وزارت مذہبی امور نے ایس ایم ایس کے ذریعے اطلاع دے دی ہے۔

حکام حج ڈاریکٹوریٹ کا کہنا ہے کہ حکومت نے سعودی عرب جانے سے قبل حج کی تربیت کو لازمی قرار دیا ہے، عازمین حج اپنے مقررہ وقت پر قریبی ٹریننگ سینٹر پر تربیتی پروگرام میں لازمی شرکت کریں، تربیتی پروگرام میں غیر حاضر ہونے کی صورت میں عازمین حج کو حج کے لیے جانے کی اجازت نہیں ہوگی۔

لاہور : مسلم لیگ ن کی سینئر نائب صدر مریم نواز عمرہ ادائیگی کے بعد وطن واپس پہنچ گئیں، وہ آج سے ہی اپنی سیاسی مصروفیات کا آغاز کریں گی۔

تفصیلات کے مطابق مسلم لیگ ن کی سینئر نائب صدر مریم نواز عمرہ ادائیگی کے بعد وطن واپس پہنچ گئیں، مریم نواز غیرملکی ایئرلائن کی پرواز کے ذریعے جدہ سے لاہور ایئرپورٹ پہنچیں۔

پارٹی ذرائع کا کہنا ہے کہ مریم نواز آج سے ہی اپنی سیاسی مصروفیات کا آغاز کریں گی۔

یاد رہے مسلم لیگ ن کی سینئر نائب صدر مریم نواز نے اپنے والد سابق وزیراعظم اور مسلم لیگ ن کے قائد میاں نواز شریف کے ہمراہ عمرے کی سعادت حاصل کی تھی۔

حرم مکی پہنچنے پر شریف فیملی کے اراکین نے اللہ کا شکر ادا کیا، عمرہ کی سعادت حاصل کرنے کے بعد مسلم لیگ ن کے قائد نواز شریف نے ملکی ترقی کے لیے دعا کی جب کہ مریم نواز شریف نے خوشی اور عقیدت کا اظہار کیا۔

دورہ سعودی عرب میں نواز شریف اور مریم نواز شاہی خاندان کے خصوصی مہمان تھے، مریم نواز نے والد کے ہمراہ رمضان کا آخری عشرہ سعودی عرب میں گزارا۔