وزیراعظم پاکستان شہباز شریف نے عمرے کی سعادت حاصل کرلی، انھوں نے پاکستان اور عالم اسلام کیلئے خصوصی دعائیں کیں۔
تفصیلات کے مطابق وزیراعظم پاکستان شہباز شریف نے دورہ سعودی عرب کے دوران عمرے کی سعادت حاصل کرلی، وزیراعظم نے پاکستان، عالم اسلام کی سلامتی، ترقی و خوشحالی کیلئے خصوصی دعائیں بھی مانگیں۔
وزیراعلیٰ پنجاب مریم نواز، وزیر خارجہ اسحاق ڈار اور وزیرخزانہ محمد اورنگزیب نے بھی عمرے کی سعادت حاصل کی۔
وزیراعظم کے ہمراہ وزیردفاع خواجہ آصف اور دیگر اعلیٰ حکام نے بھی عمرہ کرنے کی سعادت حاصل کرلی۔ اس دوران زائرین کی بڑی تعداد نے معمول کے مطابق اپنا طواف جاری رکھا۔
بعد ازاں وزیراعظم شہباز شریف سے سعودی ولی عہد شہزادہ محمد بن سلمان کی ملاقات ہوئی، اس ملاقات میں دونوں رہنماؤں نے دیرینہ برادرانہ تعلقات کو سراہا۔
وزیراعظم پاکستان شہباز شریف نے سعودی حکام کی جانب سے اپنے اور وفد کے پُرتپاک استقبال پر شکریہ ادا کیا۔