متحدہ عرب امارات (یو اے ای) کے حکام کی جانب سے ایک ہدایت نامے کے ذریعے بیروزگاری انشورنس میں رجسٹریشن نہ کرانے والوں کو متنبہ کیا گیا ہے۔
بین الاقوامی خبر رساں ادارے کی رپورٹ کے مطابق یو اے ای کے حکام نے نجی اداروں میں کام کرنے والے تمام ملازمین کو بے روزگاری انشورنس کرانے کا حکم دے دیا ہے۔
یو اے ای وزارت ہیومن ریسورسس کی جانب سے ایک ہدایت نامہ جاری کیا گیا ہے جس میں تمام ملازمین کو یکم اکتوبر تک بے روزگاری انشورنس کرانے کی ہدایت جاری کی گئی ہے۔
یو اے ای کے حکام کی جانب سے جاری کئے گئے اس ہدایت نامہ کے مطابق بیروزگاری انشورنس کیلئے رجسٹریشن نہ کروانے والوں پر 400 درہم جرمانہ کیا جائے گا۔
یو اے ای میں بیروزگاری انشورنس کو رواں برس متعارف کرایا گیا تھا جس کے تحت نوکری پیشہ ہر شخص کو اپنی بیروزگاری انشورنس خود کرانا تھی۔
ہدایت نامہ میں مطلع کیا گیا ہے کہ انشورنس کرانے والے ملازم کو نوکری ختم ہونے کی صورت میں 3 ماہ تک ایک معقول رقم دی جائے گی تاکہ وہ اپنی زندگی کے معاملات آسانی کے ساتھ چلا سکے۔
واضح رہے کہ یو اے ای میں اب تک لاکھوں ملازمین نے بیروزگاری انشورنس نہیں کروائی ہے جس کے باعث اب حکومت نے یکم اکتوبر تک کا وقت دیکر رجسٹریشن نہ کروانے پر بھاری جرمانہ عائد کرنے کا اعلان کردیا ہے، حکام کا کہنا ہے کہ اس ہدایت نامہ پر سختی سے عمل کیا جائے گا۔
