اسلام آباد: وزیراعظم کے معاونِ خصوصی برائے صحت ڈاکٹر فیصل سلطان نے کہا ہے کہ شادی تقریبا ت کی وجہ سےکرونا تیزی سے پھیل رہا ہے، اب ہمیں مشکل اور سخت فیصلے کرنا ہوں گے ورنہ صورت حال بہت خراب ہوسکتی ہے۔

اے آر وائی نیوز کے پروگرام پاؤر پلے میں میزبان ارشد شریف کے ہمراہ گفتگو کرتے ہوئے ڈاکٹر فیصل سلطان کا کہنا تھا کہ ’ہمیں اس بات کا ادراک ہے کہ کرونا کیسز میں دن بہ دن اضافہ ہورہا ہے‘۔

اُن کا کہنا تھا کہ ’عوام کی اکثریت کرونا کو سنجیدگی سے نہیں لے رہی اسی وجہ سے اب مشکل اور سخت فیصلے کرنے کا وقت آگیا ہے کیونکہ کرونا کی دوسری لہر پہلے سے زیادہ خطرناک ہوسکتی ہے‘۔

معاونِ خصوصی کا کہنا تھا کہ شادی کی تقریبات میں بھی غیر سنجیدگی کا مظاہرہ کیا جارہا ہے، اسی وجہ سے کرونا تیزی سے پھیل رہا ہے، اگر عوام نے احتیاطی تدابیر پر عمل نہ کیا تو ہم سخت فیصلے کریں گے‘۔

مزید پڑھیں: کورونا کے پھیلاؤ میں اضافہ ، این سی او سی اجلاس میں بڑے فیصلے

یہ بھی پڑھیں: کورونا کیسز میں تشویشناک اضافہ، 16 نومبر کو اسکولوں کے حوالے سے اہم فیصلے متوقع

فیصل سلطان کا کہنا تھا کہ ’پاکستان میں کرونا ویکسین پہنچنے میں ابھی بہت وقت لگے گا، فائزر کمپنی نے مؤثر ویکسین تیار کرنے کا دعویٰ تو کردیا مگر وہ دوا مارکیٹ میں آنے میں کافی وقت لگ سکتا ہے‘۔

اُن کا کہنا تھا کہ ’مختلف ممالک نے ویکسین کے حصول کے لیے پہلے سے ہی رقم جمع کروادی ہیں، پاکستان ابھی ایسی پوزیشن میں نہیں کہ خوراک کے حصول کے لیے رقم جمع کراسکے‘۔

معاونِ خصوصی کا مزید کہنا تھا کہ وزیراعظم عمران خان نے کرونا فنڈز کی منظوری دی ہے، جس میں جمع ہونے والی رقم کو کرونا وبا کی ویکسین اور روک تھام کیلئےاستعمال کیا جائے گا۔

کراچی: سندھ ہائی کورٹ نے وفاق اورسندھ کے درمیان جاری میڈیکل کالجز میں داخلے کا ٹیسٹ منسوخ کرنے کا حکم دے دیا۔

اے آر وائی نیوز کی رپورٹ کے مطابق  وفاق اور صوبے کے درمیان ایم بی بی ایس میں داخلے کےلئے انٹری ٹیسٹ تنازع کے حوالے سے دائر درخواست پرسندھ ہائی کورٹ میں سماعت ہوئی۔

جج نے سماعت کے آغاز پر پاکستان میڈیکل ایسوسی ایشن کے وکیل کو روسٹروم پر بلا کر مؤقف پیش کرنے کا حکم دیا۔  پی ایم سی کے وکیل صفائی نے عدالت کو آگاہ کیا کہ پاکستان میڈیکل ایسوسی ایشن کی جانب سے میڈیکل کالجز میں داخلوں کے لیے انٹری ٹیسٹ 15 نومبر کو لیا جارہا ہے۔

فاضل جج نے وکیل سے استفسار کیا کہ امتحانی مراکز کہاں قائم کیے گئے ہیں؟ جس پر وکیل نے جواب دیا کہ 200 سینٹر زقائم کیے گئے ہیں جبکہ خواہش مند طالب علموں کو رول نمبر بھی جاری کیے گئے۔

جسٹس محمد علی مظہر نے پی ایم سی کے وکیل سے سوال کیا کہ ’کیا طالب علموں کو امتحانی مراکز کے حوالے سے آگاہ کیا گیا ہے؟‘۔

این ٹی ایس وکیل نے عدالت کو آگاہ کیا کہ ’ہمیں امتحانی مراکز کے حوالے سے کوئی علم نہیں، بچوں کو میسج کے ذریعے مراکز کا بتایا جارہا ہے، کچھ طلبہ کو صرف ایڈمٹ کارڈ سے متعلق ہی آگاہ کیا گیا‘۔

این ٹی ایس وکیل نے بتایا کہ ’پہلا ٹیسٹ 18 اکتوبرکو تھاجو عدالت کےحکم سےمنسوخ  کیا گیا، ٹیسٹ کی منسوخی سے ہمیں معاشی نقصان کا سامنا کرنا پڑا کیونکہ ہم نے تمام انتظامات مکمل کرلیے تھے، جو نقصان ہوا عدالت اس کا معاوضہ دلوائے‘۔

پاکستان میڈیکل ایسوسی ایشن کے وکیل نے بتایا کہ ’ٹیسٹ کے لیے اسکول اور کالجز میں سینٹرز بنائے گئے ہیں، ایس ایم ایس کے ذریعے بتایا گیا ہے، طلبہ کو ایڈمٹ کارڈ مل چکے ہیں‘۔

سندھ ہائی کورٹ نے فریقین کے دلائل سننے کے بعد کیس کا مختصر فیصلہ محفوظ کیا جسے اب سے کچھ دیر قبل جاری کیا گیا۔

عدالت نے پاکستان میڈیکل ایسوسی ایشن کے تحت 15 نومبر کو منعقد ہونے والے انٹری ٹیسٹ منسوخ کرنے کا حکم دیا جبکہ 15 روز میں اکیڈمک بورڈ اور اتھارٹی بنانے کا بھی حکم جاری کیا۔

عدالتی فیصلے میں لکھا گیا ہے کہ ’اکیڈمک بورڈ10دن میں سلیبس تیار کرے کیونکہ پاکستان میڈیکل ایسوسی ایشن کے تیار کردہ سیلیبس سے طلبہ تذبذب اور پریشانی کا شکار ہوئے‘۔

یاد رہے کہ سندھ کی 5 جامعات اور طلبہ نے یکساں ٹیسٹ کے قانون کو سندھ ہائی کورٹ میں چیلنج کیا تھا جبکہ پاکستان میڈیکل ایسوسی ایشن نے ٹیسٹ کے لیے 15 نومبر کی تاریخ مقرر کی تھی۔