کراچی : رکنِ سندھ اسمبلی شرجیل انعام میمن نے اپنی وطن واپسی پر ملنے والے دونوں سونے کے تاج چھیپا ویلفیئر کو عطیہ کردیے۔
تفصیلات کے مطابق پیپلز پارٹی کے رہنما شرجیل میمن نے آج اپنے دونوں سونے کے تاج مقامی اسپتال میں چھیپا ویلفیئر کے سربراہ رمضان چھیپا کے حوالے کردیے تاکہ سماجی اور رفاعی کاموں میں استعمال ہو سکیں۔
شرجیل انعام میمن کمر درد کے باعث دو دنوں سے مقامی اسپتال میں زیر علاج ہیں جہاں چھیپا ویلفیئر کے سربراہ رمضان چھیپا ان کی عیادت کو آئے تھے اور اپنے ادارے کے لیے سونے کے تاج بہ طور عطیہ وصول کیے اس موقع پر شرجیل انعام میمن کے صاحبزادے راول شرجیل اور دیگر بھی موجود تھے۔
واضح رہے کہ شرجیل انعام میمن کی وطن واپسی کے بعد ان کے حلقے میں جلسے کے دوران یہ دونوں سونے کے تاج پہنائے گئے تھے۔
اس موقع پر رمضان چھیپا نے سونے کے تاج کا عطیہ وصول کرتے ہوئے کہا کہ شرجیل انعام میمن نے مجھ پر اور میرے رفاعی ادارے پر بھروسہ کیا ہے اور اپنی وطن واپسی پر محبت اور پیار کرنے والوں نے جو دو سونے کے تاج ان کے سرپر پہنائے تھے دونوں ہمیں عطیہ کیے ہیں جس پر میں ان کا شکر گذار ہوں۔
انہوں نے مذید کہا کہ میں اللہ تعالیٰ سے دعا گو ہوں کہ وہ شرجیل میمن اور ان کے اہل خانہ کو صحت و تندرستی عطا فرمائے اور ان کی ہر مشکل کو آسان فرما دے۔
کلکتہ : بھارت کی جادیو پور یونیورسٹی میں بھی آزادی کے نعرے لگ گئے، طلبہ نے آر ایس ایس کے سیمینار کی مخالفت میں کشمیر، منی پور اور ناگالینڈ کی آزادی کے حق میں نعرے لگائے۔
تفصیلات کے مطابق انتہا پسند ہندوؤں کے خلاف طلباء کی مہم دہلی سے جادیو پور پہنچ گئی، جادیو پوریونیورسٹی میں ہندو انتہا پسند تنظیم آر ایس ایس کے تحت سیمینار کے انعقاد کے خلاف کچھ طلبا مخالفت میں نعرے لگاتے ہوئے کلکتہ کی اکیڈمی آف فائن آف آرٹس کی لابی کے باہرجمع ہوگئے۔
اس موقع پر مشتعل طلباء نے کشمیر کی آزادی کے ساتھ ناگا لینڈ اورمنی پور کی بھارت سے علیحدگی کے نعرے بھی بلند کئے۔ طلبہ نے احتجاجی بینرز اٹھا رکھے تھے جس میں یو پی کے نئے وزیر اعلیٰ یوگی ادیتہ ناتھ کا موازنہ امریکا کے صدر ڈونلڈ ٹرمپ سے کیا گیا تھا۔
اس حوالے سے بی جے پی رہنما کا کہنا تھا کہ احتجاج بے معنی ہے، طلبہ کو ورغلایا جا رہا ہے، آزادی اظہار میں تمام حدیں پار کرنے والا بھارتی میڈیا اب طلبا پر حدیں مقرر کرنے کا راگ الاپ رہاہے ۔
راولپنڈی : چیف آف آرمی اسٹاف جنرل قمر جاوید باجوہ نے کہا ہے کہ پاکستان ایک امن دوست ریاست ہے اور خطے میں امن واستحکام کیلئے اپنا بھرپور کردارادا کرتا رہے گا۔
یہ بات انہوں نے لندن میں مختلف اعلیٰ شخصیات سے ملاقات کے موقع پر کہی، آرمی چیف جنرل قمر جاوید باجوہ جو ان دنوں لندن کے دورے پر ہیں، لندن پہنچنے پران کو گارڈ آف آنر پیش کیا گیا، انہوں نے لندن میں مصروف دن گزارا اوراعلیٰ حکام سے اہم ملاقاتیں کیں۔
پاک فوج کے شعبہ تعلقات عامہ ( آئی ایس پی آر ) کے ڈی جی کے مطابق آرمی چیف نے برطانوی چیف آف ڈیفنس اسٹاف سےملاقات کی۔
اس کے علاوہ آرمی چیف نے برطانوی خصوصی نمائندہ برائے پاکستان وافغانستان اور امریکی مشن کےکمانڈر سے بھی علیحدہ ملاقات کی ہے۔ ملاقات مین جیو پولیٹیکل صورتحال اورافغانستان سے متعلق امور پربات چیت کی گئی۔
اس موقع پر گفتگو کرتے ہوئے آرمی چیف جنرل قمر جاوید باجوہ نے کہا کہ پاکستان ایک امن دوست ریاست ہے اور خطے میں امن واستحکام کیلئے اپنا بھرپور کردارادا کرتا رہے گا۔
انہوں نے کہا کہ خصوصاً افغانستان میں امن کیلئے پاکستان اپنی تمام تر کوششیں جاری رکھے گا، افغانستان میں دیرپا امن پاکستان کےمفاد میں ہے۔
ڈی جی آئی ایس پی آر کے مطابق آرمی چیف نے سی پیک اورخطے پراس کےثمرات پر بھی روشنی ڈالی، برطانوی رہنماؤں کا بھی اپنے خیالات کا اظہار کرتے ہوئے کہنا تھا کہ خطےمیں امن واستحکام کیلئے پاکستان کا کردار قابل قدر ہے۔
بنی گالہ : تحریک انصاف کے سربراہ عمران خان کی سابق اہلیہ ریحام خان نے کہا ہے کہ اگر تبدیلی میوزیکل چیئر کا نام ہے تو اللہ ایسی تبدیلی سے سب کو محفوظ رکھے۔
وہ بنی گالہ کے علاقہ کری میں اپنی سالگرہ کی تقریب کے بعد صحافیوں سے بات چیت کر رہی تھیں انہوں نے کہا کہ تحریک انصاف کے لیڈران سے میرا ویژن ملتا ہی نہیں، پی ٹی آئی سمیت کوئی سیاسی جماعت جمہوری نہیں،جن نوجوانوں کو گیٹ پر کھڑا رکھتے ہیں انہیں کبھی اسٹیج پر بیٹھا نہیں دیکھا۔
اس موقع پر ایک صحافی نے سوال پوچھا کہ سالگرہ کی تقریب کے لئے بنی گالہ کا انتخاب کر کے کسی کو کوئی پیغام دینا چاہتی ہیں جس پر ریحام خان نے جواب دیا کہ جنہیں اللہ کوئی پیغام نہیں دے سکا ایسے لوگوں کو وہ کیا پیغام دیں گی۔
ریحام خان نے عمران خان کا نام لیے بغیر سوال کیا کہ کیاسیاست صرف خواتین کو اپنے جلسوں کی زینت بنانے کا نام ہے؟؟
انہوں نے کہا کہ خیبر پختونخوا میں تعلیمی نظام ویسا نہیں ہے جیسا کہ میڈیا میں بتایا جاتا ہے حالات اس کے بالکل برعکس ہیں۔
ریحام خان نے کہا کہ کسی سے ڈرتی نہیں ہوں لیکن پھر بھی کہتی ہوں پی ٹی آئی سمیت کسی بھی سیاسی جماعت میں جمہوریت نہیں ہے۔
ایک سوال کے جواب میں ریحام کا کہنا تھا کہ اگر کسی سیاسی پارٹی سے ملک کی خدمت کے جذبے کے تحت شمولیت کی آفر آئی تو وہ اسے قبول کریں گی۔
واضح رہے ریحام خان نے اپنی سالگرہ بنی گالہ میں غریب و نادار بچوں کے ہمراہ منائی اور سالگرہ کا کیک کاٹا اس موقع پر ریحام خان نے ریحام خان فاؤنڈیشن اسکول کی بنیاد بھی رکھی۔
کراچی: جناح انٹرنیشنل ایئرپورٹ پر احرام باندھے مسافروں کی پرواز منسوخ ہوگئی، احتجاج پر عملے نے مسافروں کو طمانچہ مارنے کی دھمکی دے دی جس پر عمرہ زائرین مشتعل ہوگئے۔
تفصیلات کے مطابق کراچی سے جدہ جانے والی پی آئی اے کی پرواز اچانک منسوخ ہوگئی جس کے باعث مسافروں کو سخت پریشانی کا سامنا کرنا پڑا،اس پرواز کے ذریعے احرام باندھے ہوئے مسافروں کو جدہ روانہ ہونا تھا۔
اے آر وائی نیوز کے نمائندے صلاح الدین کے مطابق کراچی ایئرپورٹ پر عمرہ زائرین کا احتجاج جاری ہے، 6 بجے انہیں جدہ جانے کے لیے بورڈنگ کارڈ جاری کردیے گئے بعد ازاں انہیں بتایا گیا کہ پی آئی اے کی پرواز پی کے 731 کے بوئنگ 777 طیارے میں اچانک خرابی پیدا ہوگئی ہے جس کی وجہ سے پرواز منسوخ کردی گئی ہے۔
عمرہ زائرین کے ساتھ ساتھ دیگر مسافروں کو بھی پریشانی کا سامنا ہے جس کی وجہ سے وہ برہم ہیں، مسافروں کو ایئر پورٹ پر کئی گھنٹے ہوگئے ہیں، وہ شام چار بجے سے یہاں موجود ہیں، 6 بجے پرواز روانہ ہونی تھی لیکن وہ بھی تک یہیں ہیں اور انہیں ہوٹل بھی منتقل نہیں کیا گیا۔
عمرہ زائرین نے احتجاج کیا جس پر ان کی اور عملے درمیان تلخ کلامی ہوئی، عملے کے ایک رکن نے ایک مسافر کو طمانچہ مارنے کی بھی دھمکی دی جس پر عمرہ زائرین مشتعل ہوگئے اور انہوں نے مزید احتجاج کیا۔
عملے کی جانب سے کچھ نہیں بتایا جارہا ہے کہ جہاز کب روانہ ہوگا۔
کراچی : مارشل آرٹ کے کھلاڑی ماسٹر راشد نسیم نے ایک اور عالمی ریکارڈ بنانے کا دعویٰ کردیا۔ ثابت انڈہ مُٹّھی میں لے کر تیس سکینڈ میں چھتیس کین پھاڑ ڈالے۔
تفصیلات کے مطابق کراچی سے تعلق رکھنے والے مارشل آرٹ کے کھلاڑی ماسٹر راشد نسیم نے ایک اور عالمی ریکارڈ بنانے کا دعویٰ کردیا۔ ریکارڈز کے شہنشاہ راشد نسیم نے عالمی ریکارڈ کا پہاڑ بھی سر کرلیا۔
انہوں نے ثابت انڈہ مُٹّھی میں لے کر تیس سکینڈ میں چھتیس کین پھاڑڈالے۔ راشد نسیم کے ہاتھ میں موجود انڈا بھی سلامت رہا، تابڑ توڑ مکوں سے انڈہ تو نہ ٹوٹا لیکن کین ضرور ٹوٹ گئے۔
چھیتس کین توڑ کر ماسٹر راشد گینز بک میں انیسواں ریکارڈ درج کرانے کیلئے پرعزم ہیں۔ راشد نسیم کے اس ریکارڈ کی ویڈیوز مختلف زاویوں سے ریکارڈ کرکے گینز بک آف ورلڈ ریکارڈ کو بھیج دی گئیں ہیں۔
ویڈیو کلیئر ہونےکی صورت میں راشد نسیم کے پاس ایک اور ورلڈ ریکارڈ آجائےگا۔ یاد رہے کہ اس سے قبل راشد نسیم کا نام اٹھارہ بار گینز بگ میں شامل کیا جا چکا ہے۔
لاہور : وفاقی وزیر برائے ریلوے سعد رفیق نے کہا ہے کہ ہم خود کو عدالت میں پیش کر رہے ہیں جب کہ عمران خان راہ فرار اختیار کر رہے ہیں۔
وفاقی وزیرِ ریلوے، تحریک انصاف کی جانب سے الیکشن کمیشن کو ہدف تنقیدس بنانے پر اپنا ردعمل دے رہے تھے انہوں نے کہا کہ پارٹی چندے کےنام پر فنڈ اکٹھا کر کےعیاشی کرنےکا حساب دینا پڑےگا۔
خواجہ سعد رفیق نے کہا کہ الیکشن کمیشن نے جب تحریکِ انصاف سے پارٹی فنڈز کی تفصیلات مانگیں تو عمران خان صاحب کو الیکشن کمیشن کے دائرے اختیار یاد آگیا اور ایک معزز ادارے کو متنازعہ بنانے کی کو شش کرنے لگے۔
وفاقی وزیر برائے ریلوے نے کہا ہے کہ عمران خان گھبراہٹ میں الیکشن کمیشن کے پوچھے گئے سوالوں کو پاناما کیس سے جوڑنے کی کوشش کر رہے ہیں حالانکہ فنڈنگ کیس پاناماکیس سے بھی پہلےکا زیر سماعت ہے۔
انہوں نے کہا کہ ہم نےخود کوعدالت کےسامنے پیش کیا اور میاں صاحب تیسری بار اپنی اور اپنے اہل خانہ کا حساب دے رہے ہیں جب کہ عمران خان پہلی ہی باری میں راہ فرار اختیار کرنے کے لیے پر تول رہے ہیں۔
خواجہ سعد رفیق نے تحریک انصاف کے سربراہ کو مخاطب کرتے ہوئے کہا کہ اگر آپ کی پارٹی کے فنڈز کے معاملات درست ہیں اور ان میں کوئی غیرقانونی عمل شامل نہیں تو آپ بھاگ کیوں رہے ہیں الیکشن کمیشن کا سامنا کریں۔
انہوں نے کہا کہ بجائے اس کے پارٹی فنڈز کا حساب دیا جاتا تحریک انصاف الیکشن کمیشن کو متنازعہ کرنے لگی ہے اور یہ پہلی مرتبہ نہیں ہوا ہے بلکہ اداروں پر الزام تراشی، جھوٹ، اور گالم گلوچ عمران خان کی سیاست کاحصہ ہے۔
وفاقی وزیر ریلوے خواجہ سعد رفیق نے مطالبہ کیا کہ رنگے ہاتھوں پکڑے جانے والے عمران خان قوم سےمعافی مانگیں اور اداروں پر دباؤ ڈالنے جیسے قبیح عمل سے باز آجائیں کیوں یہ نہ صرف ملک و قوم کے حق میں بہتر نہیں بلکہ یہ آپ کی سیاست کے لیے بھی زہر قاتل ہے۔
سرگودھا: بیس افراد کے قاتل جعلی پیر نے اعتراف جرم کرتے ہوئے کہا ہے کہ سب میرے بیٹے تھے اللہ کے لیے قربان کردیے۔
تفصیلات کے مطابق سرگودھا کی ایک درگاہ میں 20 افراد کو قتل کرنے والے متولی عبدالوحید کو پیش کیا گیا، پیشی سے واپسی پر ایک صحافی نے سوال کیا کہ اتنے لوگوں کو کیوں مارا تو کپڑا اوڑھے ہوئے ملزم نے جواب دیا کہ سب میرے بیٹے تھے اللہ کے لیے قربان کردیے۔ (جیسا کہ ویڈیو میں دیکھا جاسکتا ہے)
ملزم عبدالوحید نے تھانے کے اندر جو بیان دیا اس کی ویڈیو منظر عام پر آگئی، درگاہ کے متولی ملزم عبدالوحید نے کہ اس نے کسی کو زہر نہیں دیا لوگوں نے خود زہر پیا ہو تو پتا نہیں، اس نے صرف ڈنڈے سے لوگوں کو مارا۔
غصہ آیا تو میں آگ بن گیا
ملزم کا کہنا تھا کہ مجھے غصہ آیا تو میں آگ بن گیا جیسے کوئی دجال ہوتا ہے، پھر میں نے بڑا سا ڈنڈا لے کر ایک ایک کو مار کر پھینکا، میرے ساتھ یہ بچہ(آدمی) تھا میں قتل کررہا تو اور یہ پھینک رہا تھا۔
آخری سازش مجھے زہر دینا تھی جو پکڑی گئی
ملزم نے مزید کہا کہ میرے مرشد نے مجھے خود بتایا تھا کہ وہ انہیں زہر دیتے ہیں، انہوں نے کہا میں انہیں آخری سازش تک لے کر جاؤں گا، میں تو چلا جاؤں گا لیکن آخری سازش پکڑی جائے گی اور وہ آخری سازش مجھے (ملزم )زہر دینا تھی۔
دوسری جانب ابتدائی تحقیقاتی رپورٹ میں واقعے کو ذاتی دشمنی کا شاخسانہ قرار دے دیا گیا ہے۔
وزیر اوقاف پنجاب کا کہنا ہے کہ ملزم عبدالوحید نے تمام قتل ذاتی رنجش کی بنا پر کیے، متولی نے قبضہ جمائے رکھنے کے لیے جانشین سمیت تمام افراد قتل کیے، سفاک ملزم کو دو ساتھیوں ظفر اور آصف سمیت دو روزہ ریمانڈ پر پولیس کے حوالے کردیا گیا۔
قبل ازیں ملزمان کو جوڈیشل مجسٹریٹ کی عدالت میں پیش کیا گیا جہاں پولیس کی جانب سے پیش کی گئی ملزمان کے ریمانڈ کی درخواست عدالت نے منظور کرلی، جرم میں شریک چوتھے ملزم کاشف کو زخمی ہونے کے سبب عدالت نہ لایا گیا وہ اسپتال میں زیر علاج ہے۔
ڈی پی او سرگودھا کا کہنا ہے کہ جمع کیے گئے شواہد فرانزک لیب ارسال کردیے گئے، رپورٹ آنے پر مزید یپش رفت سامنے آئیں گی۔
واقعے کے بعد اندھی تقلید کا یہ عالم سامنے آیا کہ ملزم عبدالوحید کے خلاف کوئی مرید بیان دینے کے لیے تیار نہیں، آر پی او نے بتایا ہے کہ ایف آئی آر سرکار کی مدعیت میں درج کی گئی۔
مقتولین کے ورثا سامنے آگئے، ملزم کے خلاف مقدمہ لڑنے کا اعلان
بعدازاں میڈیا میں خبریں نشر ہونے کے بعد بیس مقتولین میں سے متعدد کے وارث سامنے آگئے اور انہوں نے ملزم متولی عبدالوحید کے خلاف مدعی بننے اور ہر سطح پر مقدمہ لڑنے کا اعلان کیا۔
اے آر وائی نیوز سے بات کرتے ہوئے کئی مقتولین کے ورثا نے کہا کہ میڈیا میں یہ خبر جاری ہوئی کہ مقدمے میں کوئی مدعی بننے کے لیے تیار نہیں تو اس پر ہم آج ٹی وی چینل پر یہ بیان دیتے ہیں کہ ہم ملزم کے خلاف ہر سطح پر مقدمہ لڑیں گے، ہم تھانے کے باہر موجود ہیں مگر ابھی تک ہماری مدعیت میں مقدمہ درج نہیں کیا گیا۔
آر پی او ذوالفقار حمید نے کہا کہ زمین کا جھگڑا نہیں تھا، گدی نشنی کا جھگڑا تھا، حسد اور رقابت سے معاملہ یہاں تک پہنچا، واقعے کی وجہ مریدوں کا جعلی پیر کر اندھا اعتما د تھا، ملزم کا خیال تھا کہ اسے مار کر یہاں سے نکالے جانے کی سازش کی جارہی ہے۔
ملزم نے اعتراف جرم کرلیا ہے، ملزم پاگل نہیں ہے، جو کچھ اس نے کیا ہے وہ بتارہا ہے۔
واضح رہے کہ ملزم نے اپنے مریدوں کو یہ کہہ کر قتل کیا کہ جنت کے ٹکٹ بانٹ رہا ہوں، مرنے والے سیدھا جنت میں جائیں گے بعدازاں بیس افراد کو ملزم نے تین ساتھیوں کے ساتھ مل کر ڈنڈوں اور چاقووں کے وار سے قتل کردیا، مرید ایک ایک کرکے اندر جاتے رہے اور لاشیں گرتی رہیں
دہشت کی علامت اور کئی برسوں ریسلنگ رنگ میں راج کرنے والے انڈر ٹیکر نے رومن رینز سے شکست کے بعد ریٹائرمنٹ کا اعلان کردیا۔
گزشتہ رات امریکی ریاست فلوریڈا میں ریسلنگ کی دنیا کا سب سے بڑا مقابلہ یعنی کہ ریسل مینیا 33 اور اس تاریخ ساز مقابلے کے سب سے اہم معرکے میں رومن رینز نے دہشت کی علامت انڈرٹیکر کو عبرت ناک شکست دے دی تھی۔
ریسل مینیا کے دوسرے بڑے مقابلے میں گولڈ برگ کو بروک لیسنر کے ہاتھوں انیس منٹ میں شکست کھانا پڑی، گولڈ برگ اپنی گزشتہ جیت کی روایت کو برقرار نہ رکھ سکے. گولڈ برگ نے لیسنر کو رائل رمبل میں ڈیڑھ منٹ میں شکست دی تھی، رینڈی اورٹن نے برے وائٹ کو باآسانی شکست کا مزہ چکھاتے ہوئے نویں مرتبہ ڈبلیو ڈبلیو کا ٹائٹل اپنے نام کرلیا۔
ریسل مینیا 33‘ گزشتہ رات فلوریڈا کے شہر اورلینڈو کے کیمپنگ ورلڈ اسٹیڈیم میں منعقد ہوا جہاں ریسل مینیا کے 25 معرکوں میں سے محض ایک میں شکست کھانے والے انڈرٹیکر ایک بار پھر شکست دے دوچار ہوگئے‘ اس سے قبل 2014 میں براک لیسنر نے انڈرٹیکر کو شکست دی تھی۔
میچ سے قبل اعلان ہوا کہ یہ ’نو ہولڈز بیئرڈ میچ‘ ہوگا یعنی کہ اس لڑائی میں دونوں فریق ایک دوسرے کو شکست دینے کے لیے کسی بھی داؤ یا ہتھیار کا استعمال کرسکتے ہیں۔
There will never be a undertaker again, I leave on my final last ride with WWE . I say "May my legacy Rest in peace "
دونوں سورماؤں کے درمیان ہونے والا یہ معرکہ دیکھنے کے لائق تھا۔ شائقین دم سادھے اپنے پسندیدہ ریسلرز کو ایک دوسرے مدمقابل دیکھ رہے تھے۔
رنگ کے باہرانڈر ٹیکر نے رومن رین کو ایک بار کمنٹری کی ٹیبل پر اپنے مخصوص داؤ کے ذریعے دے پٹخا، تو رنگ کے اندر رومن رین نے متعدد بار اپنے مخصوص داؤ اسپیئر کے ذریعے زمین چاٹنے پر مجبور کردیا۔
دہشت کی علامت سمجھے جانے والے ڈیڈ مین کے لیے کل کی رات کچھ زیادہ اچھی نہیں تھی جب ایک بارانہوں نے کرسی اٹھانے کی کوشش کی تو رومن رین فاتحانہ انداز میں اس پر پاؤں رکھ کر کھڑے ہوگئے۔
میچ کے اختتامی مرحلے میں جب ایک بار انڈرٹیکر کھڑے ہوگئے تو رومن رینز نے چلا کرکہا کہ ’’میں نے کہا تھا مت اٹھنا‘‘۔ جواب میں انڈر ٹیکر نے کہا کہ تم میں اتنا دم نہیں ہے۔ تاہم انڈرٹیکر کا جسم ان کی زبان کا ساتھ نہ دے پایا۔
کراچی : جناح انٹرنیشنل ایئرپورٹ پر مسافر کے بیگ سے نشہ آور کیمیکل برآمد ہوا ہے جس کی مالیت کروڑوں روپے بتائی جارہی ہے۔
تفصیلات کے مطابق پاکستان کسٹمز پروینٹو کے جناح انٹرنیشنل ائیرپورٹ ڈیپارچر پر تعینات عملے نے دوران چیکنگ قطرائیرلائن کی فلائٹ نمبر کیو آر 605 سے براستہ دوحہ سعودی عرب جانے والے مسافر سے نشہ آور کیمیکل برآمد کرلیا۔
ترجمان کسٹم کا کہنا ہے کہ محمد اکرم نامی پاکستانی مسافر کے قبضہ سے 3 کروڑ روپے مالیت کی 3.1 کلو ایمفیٹامائن برآمد کر کے ملزم کو گرفتار کر لیا گیا ہے۔
