راولپنڈی : ڈرونز کے ذریعے پنجاب سے سرحد پار منشیات اسمگلنگ کرنے میں ملوث 3 اہم ملزمان کوگرفتار کرلیا گیا، ملزمان نے بین الاقوامی روابط کے حامل منظم گینگ کے طور پر کام کا انکشاف کیا ہے۔

تفصیلات کے مطابق ڈرونز کے ذریعے پنجاب سے سرحد پار منشیات اسمگلنگ کیخلاف اینٹی نارکوٹکس فورس (اے این ایف) نے آپریشن کیا، آپریشن پنجاب سےمتصل انٹرنیشنل بارڈرکےقریب کیا گیا۔

ترجمان اینٹی نارکوٹکس فورس نے بتایا کہ کواڈکوپٹرزکےذریعےانٹرنیشنل منشیات اسمگلنگ گینگ کیخلاف کامیاب کارروائی کی ، دوران کارروائی منشیات اسمگلنگ میں ملوث3 اہم ملزمان کوگرفتار کیا گیا۔

اے این ایف کا کہنا تھا کہ ملزمان منیر،عدیل احمدکاتعلق بین الاقوامی منشیات اسمگلنگ میں ملوث تنظیموں سے ہے ، ملزمان کو 13 کلو گرام ہیروئن اور 8کواڈ کاپٹرز کے ساتھ گرفتار کیا گیا۔

دوران تفتیش ملزمان نے بین الاقوامی روابط کے حامل منظم گینگ کے طور پر کام کا انکشاف کرتے ہوئے ملزمان نے تیسرے ملک کے ذریعے رقم کی ٹرانزیکشنزکرنے کا بھی اعتراف کیا۔

ترجمان کا کہنا ہے کہ ضبط کیےگئےکواڈکاپٹرز،ڈرونزجدیدٹیکنالوجی سےلیس ہیں اور ضبط شدہ کواڈکاپٹرزآٹوریٹرن فیچر کیساتھ 15 کلومیٹر کے فاصلے تک پرواز کر سکتے ہیں۔

پشاور : وزیر اعلٰی کے پی علی امین گنڈاپور نے بجلی اورگیس کے آدھے بل دینے کا اعلان کرتے ہوئے کہا وفاق کے ذمے صوبے کے بقایاجات ہیں، کٹوتی کرے۔

تفصیلات کے مطابق وفاق کے ذمے صوبے کے بقایا جات پروزیر اعلٰی کے پی علی امین گنڈاپور نے بیان میں کہا ہم بجلی اور گیس کے بل آدھے دیں گے، وفاق کٹوتی کرے، ویسے بھی ہمارے پیسے دینے ہیں۔

علی امین گنڈاپور کا کہنا تھا کہ اپنے صوبے اور عوام کا حق مانگ رہے ہیں جو ہر صورت لیں گے، عاجزی کیساتھ اچھے ماحول میں آگے بڑھنے کو تیار ہوں، اس کےباوجود ہماراراستہ روکا گیا تو یہ ان کی بھول ہوگی۔

گذشتہ روز وزیراعلیٰ خیبرپختونخواعلی امین گنڈا پور نے کہا تھا کہ ورکنگ ریلیشن شپ کے لیےوفاق کے ساتھ چلیں گے لیکن سیاسی اور نظریاتی اختلاف رہے گا۔

ان کا کہنا تھا کہ ہمیں حق چاہیے،خیرات نہیں، صوبے اور عوام کے حقوق پر کوئی سمجھوتا نہیں کروں گا۔

اسلام آباد : اپوزیشن لیڈر عمرایوب کا کہنا ہے کہ نام نہاد صدارتی انتخاب کو مسترد کرتے ہیں، آج کا صدارتی الیکشن کالعدم ہوناچاہئے۔

تفصیلات کے مطابق اپوزیشن لیڈر عمرایوب صدارتی الیکشن میں ووٹ کاسٹ کرنے کیلئے پارلیمنٹ پہنچ گئے۔

عمر ایوب خان نے پارلیمنٹ ہاؤس کے باہر میڈیا سے گفتگو کرتے ہوئے کہا کہ صدارتی الیکشن میں محمود اچکزئی کو ووٹ دیں گے، مخصوص نشستوں کے فیصلے تک انتخاب ملتوی کرنے چاہیے تھے۔

اپوزیشن لیڈر کا کہنا تھا کہ کہ فارم47 کےتحت ہیراپھیری کرکے یہ لوگ اسمبلی پہنچے، پارلیمنٹ اورصوبائی اسمبلیاں ادھوری ہیں، الیکشن غیرآئینی ہے۔

انھوں نے کہا کہ آج یہاں سوکالڈصدارتی انتخاب ہورہا ہے ، نام نہاد صدارتی انتخاب کو مسترد کرتے ہیں، کیونکہ ہاؤس مکمل نہیں ہے۔

عمر ایوب نے مطالبہ کیا کہ آج کا الیکشن آصف علی زرداری کاکالعدم ہوناچاہئے، آصف زرداری ضعیف العمرشخص ہیں،بیمار ہیں، اس منصب کیلئےذہنی طور پر فٹ شخص ہونا چاہئے۔

انھوں نے بتایا کہ محمود اچکزئی نے الیکشن کمیشن سےدرخواست کی،مانی نہیں گئی، وزیراعظم کاالیکشن بھی نام نہادتھا،ملک میں قانون کی حکمرانی چاہیے۔

اپوزیشن لیڈر نے بانی پی ٹی آئی ، پرویزالہٰی، شاہ محمود،بشریٰ بی بی ودیگراسیران کو رہا کرنے کا مطالبہ کرتے ہوئے کہا کہ آگ کا دریا پار کرکےتحریک انصاف والےکندھن بن کر نکلے ہیں۔

ان کا کہنا تھا کہ وزیراعظم کےانتخاب کےدوران شہبازشریف کےکاغذات کوچیلنج کیاتھا، کل شام کوہم نے احتجاج کیا اور اسپیکر کو چیلنج کیا تھا۔

عمر ایوب نے کہا کہ ہم چاہتے ہیں ہاکستان میں جمہوریت ہونی چاہئے، معاشی حالات ٹھیک نہ ہوں تو مایوسی پھیلے گی، پاکستانی عوام نےجن کومینڈیٹ دیاانہیں کوایوان میں آنا چاہیے۔