عوامی مسلم لیگ کے سربراہ شیخ رشید نے کہا ہے کہ صدر مملکت ڈاکٹر عارف علوی کل الیکشن کی تاریخ دیں یا پھر استعفیٰ دے دیں۔
اے آر وائی نیوز کے مطابق عوامی مسلم لیگ کے سربراہ اور سابق وزیر دفاع شیخ رشید احمد نے لاہور میں میڈیا سے گفتگو کرتے ہوئے اگلے 60 دن کو انتہائی اہم قرار دے دیا اور کہا کہ الیکشن کمیشن نے عزت نہیں کمائی۔ آئینی طور پر صدر مملکت الیکشن کی تاریخ دے سکتے یہں۔ وہ کل الیکشن کی تاریخ دیں یا پھر استعفیٰ دے دیں۔
شیخ رشید نے کہا کہ خواجہ آصف کی رگوں میں ابھی خواجہ صفدر کا خون دوڑ رہا ہے۔ کل انہوں نے اعتراف کر لیا کہ ملک ڈیفالٹ ہو چکا ہے۔ تمام لوگوں کو بیٹھنا چاہیے اور الیکشن کی تاریخ دینی چاہیے۔ عمران خان کو گرفتار یا نااہل کرنے کی غلطی نہیں کرنی چاہیے۔
سابق وزیر دفاع کا کہنا تھا کہ مریم نواز نے کہا ہے یہ میری حکومت نہیں ہے تو پھر جرات کرو اور بتاؤ کہ کس کی حکومت ہے۔ مریم نواز کا تو اپنا شوہر اس کے بیانیے کے ساتھ نہیں ہے۔ میں نے صفدر کا تازہ بیان پڑھا لگتا ہے اسے سمجھ آگئی ہے۔
ان کا کہنا تھا کہ عمران خان کہے گا تو 22 تاریخ کو سب سے پہلی گرفتاری میں دوں گا۔ جیل میری سسرال، ہتھکڑی زیور اور موت میری محبوبہ ہے۔ یاد رکھنا ایک نیا شیخ رشید پیدا ہو گیا ہے۔ مجھے لسبیلہ، کراچی، حب، پشاور جہاں چاہو لے جاؤ تمہاری سیاست کو نیست ونابود کردوں گا۔
شیخ رشید نے کہا کہ یہ مجھے کراچی لے جانا چاہتے ہیں تو یاد رکھیں کہ میں ارشد شریف نہیں ہوں۔ جس دن یہ مجھے گرفتار کرکے کراچی لے گئے اس دن برنس روڈ کا نقشہ کچھ اور ہوگا۔ میں نے پہلے ہی ایف آئی آر لکھوائی ہوئی ہے کہ مجھے کچھ ہوا تو زرداری، رانا ثنا اللہ، بلاول، شہباز شریف اور نواز شریف ذمے دار ہوں گے۔
سینیئر سیاستدان کا کہنا تھا کہ خبر دے رہا ہوں صوبوں اور مرکز کے اکٹھے الیکشن ہوں گے۔ پاکستان کو اللہ کے بعد سپریم کورٹ بچا سکتی ہے۔ میرے ساتے 17 دنوں میں جو کچھ ہوا معاف کرتا ہوں کیونکہ جہاں میرے ہاتھ پاؤں باندھے گئے وہ میرے اپنے ادارے تھے۔
شیخ رشید نے یہ بھی کہا کہ بلاول دنیا کے ان ممالک میں جاتا ہے جو نقشے میں بھی نظر نہیں آتے۔ جہاں اس کا شدت سے انتظار ہو رہا ہے، وہاں نہیں جاتا۔ دنیا میں واحد ملک افغانستان ہے جہاں بلاول بھٹو کی ضرورت ہے۔
